Четири американски воени лица загинаа во пад на воен авион за полнење гориво KC-135 што се урна во западен Ирак, потврди денес Централната команда на САД (CENTCOM).
Според соопштението од CENTCOM, авионот се урнал вчера околу 14 часот по источно време.
Во авионот имало шест члена на екипажот, а четворица се потврдени како мртви. Операциите за пребарување и спасување на преостанатите членови на екипажот сè уште се во тек.
Американската војска соопшти дека сè уште ги истражува околностите на несреќата. Сепак, според досегашните информации, падот на авионот не бил резултат на непријателски оган или инцидент со сопствените сили.
„Околностите на инцидентот се под истрага. Сепак, губењето на авионот не е предизвикано од непријателски или пријателски оган“, соопшти CENTCOM.
Американската војска сè уште не ги објавила идентитетите на загинатите војници. Нивните имиња ќе бидат објавени дури откако ќе бидат известени нивните семејства.
Со ова бројот на загинати американски војници од почетокот на американско-израелската војна со Иран се искачи на 11.
Пентагон во неделата потврди дека бројот на убиени американски војници се искачил на седум откако беше потврдена смртта на уште еден, кој беше убиен во ирански напад врз саудиска воена база каде што беа стационирани американски војници.
Официјалните лица велат дека тој починал од повредите додека воениот медицински персонал го подготвувал неговиот трансфер за понапреден третман во американска воена болница во Германија.
Во саботата, претседателот Доналд Трамп присуствуваше на враќањето на телата на првите шест Американци убиени во војната, на свечена и тивка церемонија во воздухопловната база Довер во државата Делавер. Шест резервисти на американската армија беа убиени по иранскиот напад со беспилотни летала врз пристаништето Шуаиба во Кувајт во неделата.
