Серијата се вклопува во популарниот бран криминалистички приказни инспирирани од скандинавскиот ноар, жанр кој стекна голема популарност на Западот благодарение на наслови како што се филмот „Мажи кои ги мразат жените“ од режисерот Дејвид Финчер, како и сериите „Мостот“ и „Убиството“.

Слични серии како „The Breakthrough“, „The Åre Murders“ i „Trapped“ исто така постигнаа голема гледаност на Нетфликс. Најновиот наслов од овој жанр е дански документарец кој брзо се искачи на врвот на гледаноста, пренесе „Collider“.

Серијата следи вистинско злосторство

Серијата „Пријател, убиец“ следи вистинско злосторство што со години ја потресувало Данска. Приказната започнува во 2016 година, кога седумнаесетгодишно девојче исчезнало додека се враќало дома од забава доцна навечер. Нејзиното тело подоцна било пронајдено во мочуриште, а случајот останал нерешен долго време.

Неколку години подоцна, друга тинејџерка пријавила обид за киднапирање, тврдејќи дека била нападната од маж кој избегал кога помислил дека некој можел да го види. Истрагата конечно добила пресврт по киднапирањето на трета тинејџерка, кога полицијата успеала да идентификува можен осомничен.

Фокусот е на луѓето кои го познавале осомничениот

Документарната серија од три дела има необичен пристап кон приказната бидејќи е раскажана од перспектива на тројца најблиски пријатели на осомничениот, кои тврдат дека немале поим што направил нивниот пријател. Во серијата се појавуваат и луѓе кои учествувале во потрагата по исчезнатите девојки, како и новинар кој го следел случајот со години.

Истовремено, серијата не вклучува изјави од членови на семејствата на жртвите или преживеаните, ниту од полицајци или правни претставници вклучени во истрагата. Ова го задржува фокусот на луѓето кои го познавале осомничениот и се обидуваат да разберат што всушност се случило.

Според „FlixPatrol“, „Пријател, убиец“ е меѓу најгледаните серии на Нетфликс оваа недела, и на локалните и на глобалните топ листи. Како и многу документарци за вистински криминал на Нетфликс, серијата комбинира интервјуа со соговорниците и фиктивни реконструкции на настаните. Популарноста на таков пристап покажува колку публиката сè уште ги сака вистинските криминалистички приказни.