Лука Дончиќ ја прекина врската со својата свршеница Анамарија Голтес и води правна битка за старателство над нивните две ќерки, потврди ѕвездата на Лос Анџелес Лејкерс за „ESPN“.
НБА ѕвездата сега јавно ги потврди шпекулациите дека раскинал со својата вереница, со која е во врска 12 години и со која има две ќерки, Габриела и Оливија.
„Ги сакам моите ќерки повеќе од сè. Направив сè што можев за да бидат со мене во САД во текот на сезоната, но тоа не беше можно. Неодамна донесов тешка одлука да ја прекинам мојата врска. Сè што правам е за среќата на моите ќерки. Секогаш ќе се борам да бидам со нив и да им го дадам најдобриот можен живот“, изјавил Словенецот за споменатите медиуми.
Претходно во вторник, „TMZ“ објави дека Анамарија Голтес побарала од Лука Дончиќ алиментација и исплата на адвокатски трошоци. Извори запознаени со ситуацијата на Дончиќ за „ESPN“ изјавија дека ќерката на Дончиќ поминала само три дена со својот татко минатата пролет, додека другата ќерка никогаш не била во САД, каде што моментално живее словенечкиот кошаркар.
Тие исто така додаваат дека Лука Дончиќ, кој во август минатата година потпиша тригодишно продолжување на договорот со Лос Анџелес Лејкерс во вредност од 165 милиони долари, отсекогаш го издржувал своето семејство и ги плаќал сите трошоци на своите ќерки. Првата ќерка, Габриела, е родена во ноември 2023 година, додека малата Оливија е родена во декември 2025 година.
Како што е дополнително наведено, Дончиќ ја изразил својата желба да ја однесе својата ќерка Габриела во САД на почетокот на декември минатата година. Потоа имало несогласувања со тогашната свршеница. Таа ја повикала полицијата, но „не се пронајдени елементи на кривично дело или прекршок“ од страна на Дончиќ.
Кошаркарот се појавил во болницата во Крањ на денот на раѓањето на своето второ дете, а оттогаш наводно не ја видел ниту новородената Оливија ниту својата (поранешна) свршеница. Исто така, се наведува дека од 26 септември 2025 година, кога пристигнал во кампот на Лос Анџелес Лејкерс, ги видел своите ќерки само двапати.
Кон крајот на февруари, тој поднел барање до судовите во Словенија, барајќи итна средба со Габриела и Оливија.
Дончиќ ѝ предложил брак на Анамарија Голтес во јули 2023 година. Нивната љубовна врска траела од 2016 година. Гласини за раскинувањето се појавија во многу медиуми во последните денови, а сега самиот славен кошаркар ја потврди својата животна драма.
