Двајца тинејџери по грешка оставиле ранец во кој имало марихуана и готовина во просторот за донации пред хуманитарна продавница во Нов Зеланд, а потоа во паника се вратиле по торбата, соопшти полицијата.
Волонтер во продавницата најпрво почувствувал силен мирис, а потоа го отворил ранецот и пронашол пластични кесички со вкупно 43,2 грама марихуана, како и 3.700 новозеландски долари (околу 2.200 американски долари) во банкноти, се наведува во соопштението на новозеландската полиција.
Рекреативната употреба на марихуана и продажбата на оваа дрога во Нов Зеланд се нелегални. Одредена медицинска употреба е дозволена само со лекарски рецепт.
Инцидентот се случил на 18 февруари во регионот Саутленд на Јужниот остров. Портпаролот на полицијата не сакал да ја открие точната локација на продавницата за да го заштити персоналот.
Според полицијата, момчето и девојката го оставиле ранецот пред продавницата додека чекале нивното возило да биде сервисирано во блиската работилница. Полицијата била повикана откако вознемирените тинејџери се вратиле во продавницата барајќи ја торбата.
Во нивниот автомобил полицијата потоа пронашла и воздушен пиштол, кој малолетници не смеат да го поседуваат без дозвола и надзор од возрасно лице, полициски скенер, како и дополнителна количина готовина. Поседувањето полициски скенер во Нов Зеланд не е противзаконско, но е кривично дело да се споделуваат или да се постапува според информациите што се слушаат преку него.
Полицијата не објави детали за обвиненијата што се покренати против уапсените тинејџери ниту дали тие веќе се појавиле пред суд.
Во Нов Зеланд важат строги правила за известување од предмети пред Судот за млади, пред кој обично се водат постапки против лица помлади од 17 години.
