[ВИДЕО] Дрон предизвика пожар во складиште за нафта во Русија

Украинските власти засега не се огласија за настанот. Руското министерство за одбрана тврди дека во текот на ноќта соборило четири украински дрона над Краснодарскиот крај.

Пожарот избувнал во складишно-претоварното постројување на Јужната нафтна компанија во градот Армавир. Жителите пријавиле дека непосредно пред пожарот слушнале експлозии и забележале дејствување на противвоздушната одбрана.

Кадри објавени на локалните социјални мрежи покажуваат пламен што се издига од постројувањето додека на местото пристигнуваат итните служби.

Краснодарскиот крај, кој се наоѓа на југозападот на Русија покрај Црното Море, повеќепати бил цел на напади со дронови во рамки на украинските удари врз руската енергетска и воена инфраструктура.