Новата сезона на Формула 1 започнува овој викенд во Австралија, а кога станува збор за заработката, повторно надвор од каква било конкуренција е Макс Верстапен.
Како што известува емисијата „South Florida 6“ на „NBC“, дури 20 од 22 возачи кои ќе ја започнат новата сезона на Формула 1 оваа година ќе заработат повеќе од еден милион долари.
Секако, колку што е возачот подобар и колку што е тимот попознат, толку обично заработуваат повеќе пари – но кој ќе заработи најмногу во 2026 година? Одговорот е, секако, Макс Верстапен.
Фантастичниот холандски возач оваа година, според проценките, ќе заработи 60,3 милиони евра од сите награди и спонзорски договори.
Верстапен се појавува во кампањите на „Red Bull“, а соработува и со брендовите „TAG Heuer“, „Heineken“, „EA Sports“, „Viaplay“ и „AlphaTauri“. Во меѓувреме, „Fanatics“ неодамна најави повеќегодишно партнерство за продажба на производи со брендот на Верстапен. Холанѓанецот исто така соработувал со „CarNext.com“, „Ziggo“ и „G-Star RAW“.
На второто место, исто така очекувано, се наоѓа британската ѕвезда Луис Хамилтон. Се очекува Британецот оваа сезона, како возач на „Ferrari“, да заработи 51,6 милиони евра.
Покрај заработката во овој спорт, возачот на „Ferrari“ соработува и со повеќе брендови, вклучувајќи ги „Lululemon“, „Dior“ и „Tommy Hilfiger“. Британецот исто така има удели во „Lewis Hamilton Ventures“, „Dawn Apollo Films“, брендот на безалкохолни алкохолни пијалаци „Almave“ и линијата на облека „Plus 44“.
На третото место е Шарл Леклер, од кого се очекува оваа сезона да заработи 29,3 милиони евра, исто колку и Џорџ Расел. На петтото место е Ландо Норис (25,8 милиони евра), а потоа следи Фернандо Алонсо со проценета заработка од 17,2 милиони евра.
Меѓу десетте најплатени возачи се уште и Карлос Саинц и Оскар Пјастри со по 11,2 милиони евра, како и Алекс Албон и Пјер Гасли со по 10,3 милиони евра.
