Воените аналитичари ги проценуваат можните воени опции на Иран по утринскиот напад, истакнувајќи дека одговорот на Техеран ќе зависи од процената на заканата, но дека земјата располага со значаен арсенал со кој може да возврати.
Ракетен арсенал како главна закана
Воениот аналитичар Шон Бел истакнал дека Иран, иако не е воена суперсила како Соединетите Држави, поседува исклучително голем број балистички проектили. „Како што видовме минатата година, кога проектили се лансираат во бранови, можеби еден или десет нема да стигнат. Но ако лансирате 100 или 500, самата бројност носи предност“, објаснил Бел.
Можни цели и економски последици
Израел веројатно нема да биде единствената цел на иранскиот одговор. „Можеби ќе нападнат и воени објекти на САД. Во регионот има многу воени бази“, нагласил Бел. Тој потсетил и на неодамнешната воена вежба во Ормускиот теснец. „Пред само неколку дена изведоа вежба со боево гаѓање во Ормускиот теснец и го затворија. Тоа е важно затоа што околу 20% од светската нафта поминува низ тој теснец, па таков потег веднаш би предизвикал нарушување на нафтените пазари“, предупредил аналитичарот.
Новиот носач на дронови како адут во ракавот
Бел исто така укажал на новата закана што ја претставува бродот-носач на дронови „Шахид Багери“.
„Интересен е и Шахид Багери, релативно новиот ирански носач на дронови кој сега е во служба и дејствува прилично блиску до американските носачи на авиони. Од него може да се лансира голем број моќни дронови“, објаснил тој.
Иако американските носачи имаат многу ефикасна одбрана, Бел смета дека масовен напад со дронови би можел да ја преоптовари.
„Ако таа одбрана ја засипете со 20, 30 или 50 дронови одеднаш, Американците би можеле да се почувствуваат ранливи. Тоа веројатно не би потонало носач, но секако би било силна порака“, додал аналитичарот.
Одговорот зависи од процената на нападот
Уредничката за одбрана и безбедност Дебора Хејнс истакнала дека иранскиот одговор ќе зависи од тоа како Техеран ќе го протолкува нападот. Таа рекла дека Иран веќе „симулирал“ слични напади од Израел и САД и дека е подготвен.
„Иран поседува значајни резерви на балистички и крстосувачки ракети, како и беспилотни летала. Способен е да нанесе значителна штета“, нагласила Хејнс.
„Клучно ќе биде дали режимот овој напад ќе го доживее како егзистенцијална закана и поради тоа во одговорот ќе оди на сè или ништо. Прашање е и до кој степен тоа може да го изведе со оглед на своите резерви и напаѓачки способности, земајќи ги предвид операциите што веќе се спроведени против него“, заклучила таа.
