Американскиот претседател Доналд Трамп во своето обраќање пред Конгресот ја спомена 23-годишната Украинка Ирина Заруцка, која беше брутално убиена во август 2025 година.
Трамп ја искористи нејзината трагична судбина за да ги критикува политиките кои, според него, им дозволуваат на опасните криминалци да останат на слобода, пишува Украинска правда.
„Таа избега од брутална војна само за да биде убиена во Америка од закоравен криминалец ослободен да убива“, рече Трамп.
Трамп истакна дека и покрај напредокот, опасните повеќекратни престапници продолжуваат да се ослободуваат поради политиките што ги поврзал со демократите.
Потоа се обрати на мајката на Ирина Заруцка, Ана, која беше присутна во салата.
„Вечерва ни е чест да бидеме домаќини на жена која поминала низ пекол, Ана Заруцка. Таа и нејзината прекрасна ќерка Ирина – толку убава, толку прекрасна млада жена – избегаа од воено разурната Украина во 2022 година за да живеат кај роднини во близина на Шарлот, Северна Каролина“, започна Трамп.
„Минатото лето, 23-годишната Ирина се враќаше дома со воз кога едно пореметно чудовиште, уапсено повеќе од десетина пати и ослободено без кауција, стана и дивјачки ја пресече по вратот и телото со нож. Никој никогаш нема да го заборави ужасниот израз на лицето на Ирина додека го гледаше напаѓачот во последните секунди од својот живот. Таа почина на самото место“, продолжи тој.
„Госпоѓо Заруцка, ви ветувам вечерва дека ќе обезбедиме правда за вашата прекрасна ќерка Ирина“, заклучи американскиот претседател.
