Мостот преку Месинскиот теснец, кој треба да ја поврзе Сицилија со копнена Италија, уште од самиот почеток предизвикува бројни контроверзии, а британскиот „Telegraph“ го опиша како облог на италијанската премиерка Џорџа Мелони вреден 13,5 милијарди евра што ќе ја унапреди или уништи Италија.
Уште од самиот нацрт на проектот, италијанската власт изрази надеж дека изградбата на најдолгиот висечки мост во светот силно ќе ја поттикне економијата. Меѓутоа, граѓаните кои живеат во подрачјето каде што ќе се гради мостот изразија голема загриженост поради проектот.
Имено, 500 куќи се предвидени за експропријација и уривање за да се направи место за еден од најамбициозните инженерски проекти во светот – изградба на висечки мост од италијанското копно до Сицилија, распон од челик и бетон долг две милји кој го преминува Месинскиот теснец.
„Мојата куќа ќе биде уништена. Губењето дом поради проект што е бескорисен и во суштина конфузен е целосно неприфатливо“, изјави една од жителките на ова подрачје.
Изградбата подразбира 40 километри нови патишта и железнички пруги, 10 вијадукти, тунели и три железнички станици. Секој час, 6.000 возила ќе минуваат преку шесте ленти на автопатот.
„Мостот ќе биде бескорисен, опасен, штетен за животната средина и скап“, изјави Даниеле Јалаква, водач на протестната група наречена „No Ponte Capo Peloro“.
Тој рече дека 13,5 милијарди евра би било подобро да се потрошат за поправка на распаднатата инфраструктура во јужна Италија, од училишта и болници до патишта и железници.
„Која е целта на изградба на нов, сјаен мост кога пристапните патишта се напукнати и полни со дупки. Ќе можеш да трчаш како зајак преку мостот, а потоа да ползиш како желка до крајот на патувањето“, изјави тој.
Италијанската влада инсистира дека изградбата на мостот ќе започне оваа година, а се тврди дека проектот ќе генерира повеќе од 100.000 работни места.
„Мостот ќе делува како катализатор за инвестиции во јужна Италија“, наведува градежната компанија „Webuild“, пренесува британскиот „Telegraph“.
Изградбата на мостот ќе има позитивно влијание врз италијанскиот БДП од над 23 милијарди евра, според агенцијата „OpenEconomics“, консултантска фирма што анализира големи јавни проекти.
Професорот Ерик Џоунс, политички економист и директор на Центарот за напредни студии Роберт Шуман на Европскиот универзитетски институт во Фиренца, укажува на примерот на мостот Данска–Шведска кој беше изграден меѓу Копенхаген и Малме пред 25 години.
„Економските придобивки беа огромни. Или земете го за пример мостот што беше изграден на јадранскиот брег за да поврзе два дела на Хрватска кои се разделени со дел од босанска територија. Тоа беше огромна инвестиција, но се исплатеше“, изјави тој.
Мостот доаѓа во критичен момент за премиерската функција на Џорџа Мелони. Од една страна, таа ѝ обезбеди на Италија редок период на политичка стабилност откако беше избрана во есента 2022 година. Нејзиното стабилно лидерство и претпазливиот пристап кон јавната потрошувачка ја освоија довербата на финансиските пазари.
Таа исто така ја намали стапката на невработеност, која неодамна падна на 5,6 проценти, што е најниско ниво во повеќе од 20 години, според податоците на „Istat“, националниот статистички завод.
Сепак, критичарите велат дека многу од новите работни места се со скратено работно време и слабо платени.
Постојат и стравувања дека двете најмоќни италијански криминални организации – Ндрангета во Калабрија и Коза Ностра на Сицилија – ќе се инфилтрираат во процесот на доделување договори и ќе украдат милиони евра.
Матео Салвини, министер за сообраќај и инфраструктура, изјави дека неизградбата на мостот поради страв од инфилтрација на мафијата би претставувала „предавање“ на италијанската држава на организираниот криминал.
Денес
