Познато е дека Доналд Трамп се фали со одлично здравје. Во една прилика изјави дека претседателските кандидати имаат обврска да бидат здрави, а за резултатите од своите медицински тестови зборуваше во различни емисии. Откако темата повторно се актуализира, особено поради портокаловата нијанса на кожата која кај Трамп е очигледна, многумина почнаа да се интересираат и за исхраната на новиот претседател на САД. Таа е прилично изненадувачка.

Пред сè, Доналд Трамп не е пребирлив кога станува збор за храната. За разлика од многу претседателски кандидати кои имаат лични готвачи и посебни менија секој ден, Трамп ужива во брза храна, како и многу Американци. Сепак, тоа не го менува фактот дека неговата исхрана изненадува многумина. Еве што јаде во текот на еден ден:

Прескокнува појадок

Доналд Трамп во разговор со Џеси Вотерс од „Fox News“ во 2016 година изјави дека, кога може, го прескокнува појадокот. Ручекот во повеќето случаи му е првиот оброк, а омилен оброк во денот му е вечерата. Сепак, понекогаш решава да појадува, а тогаш најчесто избира јајца и сланина, житарици или „McDonald’s“ „McMuffin“. Трамп никогаш не пие чај ниту кафе.

Стекот е омилено јадење

Навиките во исхраната на Доналд Трамп се откриени и во книгата „Let Trump Be Trump“, напишана од поранешниот шеф на неговата кампања Кори Левандовски. Тој тврди дека претседателот често може да издржи 14 до 16 часа без храна. Голем љубител е на месна векна, што е познато уште од 2005 година, кога со Меланија гостуваше кај Марта Стјуарт. Таму подготвуваа оброк за кој Трамп рече дека му е омилен.

Ништо без брза храна

Доналд Трамп речиси секојдневно јаде брза храна, вклучително и од „McDonald’s“, „Burger King“ и „KFC“. За вечера најчесто избира „McDonald’s“, каде обично нарачува два „Big Mac“, два „Filet-O-Fish“ и мал чоколаден шејк. Пицата исто така е дел од неговата исхрана, но никогаш не ја јаде кората. Обожава хамбургери, кои бара да бидат добро испечени, а како прилог најчесто избира кечап.

Кафе и чај не пие, но затоа наутро сака да пие диетална „Coca-Cola“. Наводно, за време на првиот мандат во Белата куќа имал поставено копче за диетална „Coca-Cola“, која му ја носеле и до 12 пати дневно. Со неа сака да јаде грицки, најчесто чипс. Инаку, се тврди дека Трамп секогаш отвора ново пакување грицки, дури и ако во претходното останало нешто. Тоа го прави затоа што има изразен страв од бактерии.