Три навики пред појадок

Хамилтон вели дека се труди утринската рутина да ја одржува што поконзистентна за денот да започне како што треба. „Се будам, пијам вода, малку се истегнувам и си земам момент да ги средам мислите“, објаснува возачот на Формула 1. Дури потоа појадува, а оброкот, како што вели, најчесто е едноставен. Обично избира нешто богато со протеини – овесни снегулки или смути.

Омилен вегански оброк

Бидејќи е на веганска исхрана, важно му е да внесува доволно протеини. На прашањето кој му е омилен оброк богат со протеини, Хамилтон одговара: „Најмногу сакам поке боул со мариниран тофу, киноа и додатоци како наут или едамаме.“ За него „добро да се јаде“ значи да се одржува рамнотежа. „Клучот е во рамнотежата. Таа го поддржува начинот на кој тренирам, како се чувствувам и како функционирам секој ден“, изјави тој.

Зошто избрал живот без алкохол

Одлуката да го исфрли алкохолот од секојдневието, вели, произлегла од желбата да го извлече максимумот од себе во спортот. „Отсекогаш сум сакал текила, но поради тренинзите и густиот распоред најчесто ја прескокнував“, појасни тој. Бидејќи на пазарот не нашол безалкохолна опција што навистина му „легнала“, решил да создаде своја.

„Постојат одлични безалкохолни опции, но никогаш не најдов текила што навистина има вкус како вистинска. Затоа почнав да истражувам како би можел да изгледа безалкохолен пијалак на база на агава што е навистина убедлив.“ Додава дека посветеноста на здравјето му го променила односот кон алкохолот, но дека и понатаму сака дружења.