Како Југославија направи хаос на „Евровизија“: Се појави необична снимка

Традиционалната манифестација „Евровизија“ во 1981 година се одржа во Даблин, а улогата на водителка ја имаше Дорин Ни Брајан.

Откако настапија сите натпреварувачи, следуваше вклучување на телевизиските центри ширум Европа, за да бидат соопштени гласовите на националните жирија, пишува „Dnevno.hr“.

Кога Брајан ја повика Југославија, поточно Загреб, и ја замоли новинарката и водителка Хелга Влаховиќ да ги соопшти бодовите, во преносот настана збунувачка тишина. Неколку моменти не се слушаше ништо, а потоа Хелга кратко се јави и соопшти дека „бодовите сè уште не се подготвени“.

Брајан повторно го повтори прашањето, по што Хелга повторно се вклучи и на крај ги објави резултатите од гласањето. Во еден момент, таа ја изговори и реченицата што стана дел од евровизиската историја. На прашањето какви се резултатите, се слушна: „Ги немам“.

Тогаш малкумина сфатија дека хрватската водителка всушност ѝ се обраќала на техничката екипа во студиото, обидувајќи се да им објасни дека нема воспоставена врска со Даблин, но нејзините зборови ги слушнаа гледачите ширум Европа.

Таа година Југославија на „Евровизија“ ја претставуваше Сеид Мемиќ Вајта со песната „Лејла“, додека победата ја однесе Велика Британија со песната „Making Your Mind Up“, во изведба на групата „Bucks Fizz“.

Снимката од оваа несмасна, но симпатична ситуација, денес често се споделува на социјалните мрежи, каде што многумина и понатаму ја нарекуваат еден од „најсмешните моменти во историјата на Евровизија“.

Хелга Влаховиќ почина на 27 февруари 2012 година, по тешко боледување.