Европската Унија се огласи по соборувањето на претседателот Николас Мадуро во Венецуела, велејќи дека внимателно го следи развојот на ситуацијата и ги повикува сите страни на воздржаност, јави хрватски „Индекс“.
Високата претставничка на ЕУ за надворешни работи и безбедносна политика, Каја Калас, објави дека разговарала со американскиот министер за надворешни работи, Марко Рубио, како и со амбасадорот на ЕУ во Каракас.
„Европската унија внимателно ја следи ситуацијата во Венецуела“, рече Калас.
Таа потсети дека ЕУ постојано нагласува дека Николас Мадуро нема легитимитет и дека Брисел постојано се залага за мирна политичка транзиција во таа земја.
„Во сите околности, принципите на меѓународното право и Повелбата на Обединетите нации мора да се почитуваат. Повикуваме на воздржаност“, рече Калас.
Во меѓувреме, најистакнатата претставничка на венецуелската опозиција порача дека се подготвени да ја преземат власта.
