Сепак, украинската армија не ги прима сите заинтересирани пишува Дојче Веле.

Тенкови во движење, воени конвои, уништени згради, непрестајни сирени за тревога и напади со беспилотни летала, ова е брутално секојдневие во делови од Украина. За повеќето млади луѓе во Германија, доброволното одење на бојното поле е незамисливо. Сепак, има и такви кои сакаат да се приклучат на украинската армија за да ја поддржат земјата во борбата против руската инвазија.

Осумнаесетгодишниот Ноа од Дармштат е еден од нив. Ова лето, тој го положил стручната матура за ИТ техничар. Во слободно време, тој развива апликации за пресметување на траекторијата на гранатите и управува со цивилни беспилотни летала. Ноа сака да се придружи на украинската единица за беспилотни летала.

„Попрво би се придружил на единицата за беспилотни летала бидејќи веќе сум донекаде запознаен со таа област“, изјавил тој за „Y-Kollektiv“.

Тој е свесен дека воениот ангажман во Украина вклучува и убивање луѓе. „Тоа се прави, колку и да звучи брутално или цинично, за повисока цел, да се зачува светскиот демократски поредок“, рекол Ноа.

Со диплома за мајстор-кровопокривач на бојното поле

Од друга страна дваесет и петгодишниот Франко веќе доброволно се бори во Украина. На почетокот сакал да помогне со хуманитарна помош, но брзо сфатил дека на Украина не ѝ се потребни занаетчии, туку војници.

Веќе две години овој школуван мајстор-кровопокривач војува на бојното поле. Од соборците со кои дошол во Украина, денес веќе никој не се бори. „Петмина загинаа, останатите се тешко ранети“, истакнал Франко. Сите биле од Европа.

Не е познато колку германски доброволци моментално се борат во Украина. Според процените на украинските власти, веројатно станува збор за неколку стотици луѓе. Оние кои сакаат да се приклучат на војската можат да аплицираат преку интернет, на пример преку Меѓународната легија за одбрана на Украина. Онлајн апликации нуди и специјалната единица „Azov International Battalion“

„Ова не е камп за обука“

Франко е претпазлив во врска со фактот дека 18-годишници доброволно се пријавуваат за рововска војна.

„Секако дека има и такви кои немаат поим во што се впуштаат. Затоа им се вели отворено: тука можеш да го изгубиш животот, бидејќи ова не е камп за обука“.

Поради високиот ризик од насочени воздушни напади, единицата во која се наоѓа сместена е на тајна локација, во таканаречена „безбедна куќа“ на периферијата на разурнатиот Харков. Неколку населби во градот се целосно уништени. Харков е оддалечен само 30 километри од руската фронтовска линија, а нападите со беспилотни летала се случуваат речиси секојдневно на периферијата на градот. И покрај тоа, до градот сè уште може да се допатува со воз.

20-годишен војник со прекар „Лефти“ исто така се бори на бојното поле во близина на Харков. Тој го добил прекарот затоа што, како што вели, пука речиси исто толку добро со левата рака како и со десната. Неговиот татко и дедо исто така биле во војска.

„Лефти“ дошол во Украина на 18 години, кратко по завршувањето на средното училиште. „Сите тие злосторства што се случија таму беа неприфатливи за мене, особено на европска почва“, истакнал тој. Тој и неговиот другар Страт, кој е половина Норвежанец, половина Швајцарец, се сретнале на паркинг во близина на бојното поле.

Постојаното присуство на смртта

За „Лефти“, агресорската војна на Русија е напад врз демократијата што треба да се брани. „Врз демократијата и слободата, кои во Руската Федерација едноставно ги нема“. Тој не сака да дозволи повеќе луѓе да паднат под руско влијание. Но, признал дека делумно е воден и од желбата за авантура.

„Секогаш има добри моменти, особено по мисија – спомените и приказните што ги носите со себе. Сè е добро сè додека никој не загине“, објаснил тој.

„Колку и да звучи глупаво, понекогаш сè по малку се чувствува како видеоигра. Но, истовремено постојано се соочувате со близината на смртта“, додал Лефти.

Војниците постојано умираат на бојното поле. Не е познато колку украински војници се убиени досега, бидејќи Украина не објавува такви бројки. Во интервју со новинарот Пирс Морган во февруари, претседателот Володимир Зеленски изјавил дека 45.100 војници загинале, а околу 390.000 се ранети. Овие бројки не можат да се потврдат независно, а воените експерти проценуваат дека вистинските загуби би можеле да бидат многу поголеми.

Одбиен на регрутацијата во Киев

Исто како „Лефти“ и Ноа од Дармштат отпатувал во Украина на 18-годишна возраст, без знаење на неговите родители. Во едно кафуле во Киев, тој се сретнал со регрутер од единицата „Azov International“. Единицата Азов се смета за елитна единица, иако во минатото била контроверзен поради врските со крајната десница. Според неговите сопствени тврдења, денес тој јасно се дистанцира од таквата идеологија.

Но, не се прифаќаат сите што сакаат да се борат. По интервјуто, Ноа бил одбиен. Регрутерот му рекол дека е прерано.

„Ја сега разговарам со дете, а не со војник“, изјавил тој за „Y-Kollektiv“.

И покрај разочарувањето, Ноа не се откажува. Тој размислува да се обиде да ѝ помогне на Украина на други начини, како на пример со работа во украинската индустрија за оружје.