Со речиси 18 проценти од територијата покриена со зеленило и со повеќе од 3000 паркови од различни големини означени како „јавен отворен простор“, Лондон со право се смета за една од најзелените престолнини во светот. А во „море од зеленило“ се крие и една необична шума во која е дозволен влез само два часа неделно!

Шумата е со големина на две хокејски игралишта, па се смета за најмалиот резерват на природа во Лондон

Шумата позната под името „Barnsbury Wood“ првично била градина што му припаѓала на член на британскиот парламент од 19 век, Џорџ Торнхил. Таа има површина од само 0,35 хектари, што е приближно големина на две хокејски игралишта, поради што ја нарекуваат најмалиот локален резерват на природата во Лондон.

Торнхил во 1840-тите години изградил куќа и недалеку од неа уредил едно мало парче природа и направил градина, која со текот на времето била напуштена и препуштена на шумските пространства. Повеќе од сто години подоцна, во 1970-тите, локалниот совет ја купил земјата со намера да гради на неа, но во 1990-тите наместо тоа одлучиле да ја претворат во природен резерват — најмалиот во градот — за кој се грижат локални волонтери. Денес просторот се користи и за едукација на учениците за прашања поврзани со заштитата на животната средина.

Иако шумата се појавила на телевизија, како локација во една од филмските адаптации на безвременската Агата Кристи, таа е малку позната, освен можеби на нејзините диви жители, како што се долгoопашестата сеница, малиот елен, обичната жаба крастава и бројни други заштитени видови.

Оваа шума е заштитено подрачје, што значи дека се настојува да се зачува нејзината природна убавина и еколошка важност во рамките на градската средина

На релативната анонимност на шумата ѝ придонесува и ограниченото работно време. Имено, сите што сакаат да го истражат ова необично место можат да го сторат тоа само во вторник од 14:00 до 16:00 часот, во периодот од октомври до јуни. Во лето, пристапот е малку поинаков, па сите посетители од јули до крајот на септември можат да прошетаат низ најмалиот природен резерват во Лондон секоја сабота од 14:00 до 16:00 часот.

Ако живеете во Лондон и сакате почесто да ја посетувате оваа прекрасна шума, постои уште еден начин. Имено, волонтерска група која се грижи за три природни резервати во Ислингтон се состанува секој четврток од 10:00 до 15:30 часот за да ги извршува работите кои, според официјалната веб-страница, вклучуваат „косење ливади, одржување на градината, грижа за животните, кастрење дрвја и одржување на езерцата“. Не е потребно претходно искуство, а сите алати се обезбедени.

Доколку се најдете во Лондон и токму е вторник, можете да ја искористите можноста и да тргнете кон Ислингтон. Сите детали за можностите за посета ќе ги најдете на официјалната страница на општината.