Објавена е снимка на која се гледа како хуманоидниот робот Оптимус, произведен од американската компанија Тесла, се расипал и паднал додека служел пијалаци на еден настан.
Станува збор за настанот „Autonomy Visualized“ во продавницата на Тесла во Мајами. Американскиот портал специјализиран за технологија „Electrek“ пишува дека настанот е организиран за да се прикаже автопилот технологијата и роботот Оптимус.
Она што американските медиуми го оценија како најчуден дел во гореспоменатата снимка е движењето на рацете и дланките на роботот додека се наведнува наназад и паѓа. Имено, се чини дека роботот ги соблекувал VR слушалките, што овозможува влез во виртуелна реалност.
Ова води до сомнеж дека Оптимус може да се контролира од далечина, иако извршниот директор на Тесла, Илон Маск, ја фали автономијата на овие роботи, пренесе „Mashable“.
На почетокот од минатиот месец, Маск го претстави Оптимус на годишниот состанок на акционерите на Тесла, за кој рече дека ќе ја искорени сиромаштијата и ќе биде поспособен од лекарите.
Постојат индикации дека Тесла има намера да престане да произведува електрични автомобили, односно да произведува само хуманоидни роботи, т.е да развива вештачка интелигенција (ВИ). За прв пат, новите модели на автомобили не беа споменати во мастер планот на оваа компанија.
