Американската пејачка Мајли Сајрус се пошегува дека нејзиниот свршеник Макс Морандо го купил вереничкиот прстен на попуст за „Black Friday“.
Имено, 33-годишната ѕвезда гостуваше во епизода од емисијата „Jimmy Kimmel Live!“, каде што го покажа вереничкиот прстен со дијамант во форма на перниче.
Прстенот за првпат јавно го носеше на светската премиера на филмот „Avatar: Fire and Ash“ во Лос Анџелес, во понеделник, на 1 декември, а веќе следниот ден ги потврди гласините за свршувачката.
Додека разговараше со Џими Кимел, водителот ѝ честиташе за свршувачката.
„Се прашувам дали сфаќа дека ако почекаше три недели, немаше да мора да смислува божиќен подарок“, ѝ кажа Кимел.
„Ова беше понуда за ‘Black Friday’, душо“, се пошегува Мајли Сајрус.
Франческа Сајмонс од компанијата „Francesca Simons Consulting“, претставничка на дизајнерката на накит Џеки Ајш, потврди за магазинот „People“ дека Ајш го изработила прстенот по мерка, со камен исечен во форма на перниче поставен на дебел прстен од 14-каратно жолто злато.
Потпретседателката за продажба во „Blue Nile“, Даниела Тарантино, проценува дека прстенот би можел да вреди и до 450.000 долари.
„Овој веренички прстен е дебел златен прстен со рамка поставена во насока исток-запад – модерен и шик тренд што го гледаме во индустријата за венчавки. Веруваме дека прстенот е отприлика модифицирано перниче од четири или пет карати, кој чини меѓу 300.000 и 450.000 долари“, навела Тарантино.
Рејн Хирш, амбасадорка на брендот „Worthy“ и поранешна проценителка во „Antiques Roadshow“, проценува дека малопродажната вредност е некаде меѓу 150.000 и 250.000 долари.
Тројната добитничка на „Греми“ и тапанарот првпат романтично беа поврзани во декември 2021 година, кога беа фотографирани зад сцената за време на нејзиниот празничен специјал на „NBC“ во Мајами.
Неколку месеци подоцна, во април 2022 година, ја потврдија својата романса кога беа видени како страсно се бакнуваат во Холивуд.
