Сагата за интимната снимка на Ким Кардашијан овие денови доби продолжение во вид на тужба што против неа и нејзината мајка Крис Џенер ја поднел раперот Реј Џеј, чие вистинско име гласи Реј Норвуд помладиот.

Овој музичар бил интимен со Ким пред дваесетина години, и токму тоа видео ја лансираше старлетата во небото на шоу-бизнисот, а него — како што рекол — го одвел во понор.

Реј Џеј тврди дека Ким и Крис го прекршиле договорот за спогодба вреден шест милиони долари, бидејќи повторно зборувале за спорното видео во епизода од ријалити-серијата „The Kardashians“. И тоа е само една во низата меѓусебни тужби.

„Ти мене за клевета, јас тебе за прекршен збор“

Реј Џеј со новата тужба всушност возвратил на тужбата на Ким и Крис, која тие ја поднеле минатиот месец. Тој го нарекол тој потег „ПР фарса“ исполнета со „злонамерни невистини“, чија цел не е правда, туку „публицитет, моќ и казна“.

Раперот истакнува дека двете го тужеле за да го „нахранат гладот за внимание“ и да му се одмаздат затоа што „повеќе не сака да учествува во нивната измислена приказна“. Затоа бара отфрлање на тужбата и отштета од еден милион долари, заедно со покривање на судските трошоци.

„Ким и Крис изрежираа снимката да се пушти во етер“

Музичарот останува при претходно изнесените тврдења дека снимката настанала со обострана согласност и дека Ким инсистирала нејзината мајка да го надгледува објавувањето.

Според него, тројцата во 2007 година потпишале договори со компанијата за содржини за возрасни „Vivid Entertainment“, која ја објавила снимката.

Ким потоа поднела лажна тужба против „Vivid“, тврдејќи дека не се согласила на дистрибуција, сè со цел да се „создаде публицитет пред објавувањето“. Тие тврдења, според него, „биле лага“.

Ново реално шоу, нов хаос

Работите се искомплицирале во новата сезона на „The Kardashians“ во април 2022 година. Раперот тогаш порача дека Ким и нејзината мајка „измислуваат нова лажна контроверзија околу интимната снимка“ за да привлечат гледачи.

Ким јавно го обвинила Реј дека снимката му ја дал на својот поранешен менаџер и дека „сексуално ја нападнал“ додека спиела. Исто така, заедно со Кендал Џенер и Канје Вест го обвиниле за уцена поврзана со лаптоп во кој наводно имало уште снимки.

Реј Џеј потоа ги тужел Ким и Крис, а конфликтот бил решен во април 2023. Како што тој сега тврди, мајката и ќерката тогаш се согласиле да му платат шест милиони долари со ветување дека повеќе нема јавно да зборуваат за снимката.

Според него, тие го прекршиле договорот во мај 2023, кога повторно проговориле за темата во ријалити-серијата. По неговите коментари за „TMZ“ и „Twitch“, неодамна го тужеле за клевета. Адвокатите на Ким и Крис се убедени дека ќе го добијат случајот.

Со снимката до светска популарност

Ким и Реј биле во врска од 2002 до 2006 година и го снимиле својот интимен однос за време на патување во Кабо во 2004 година. Видеото не излегло во јавност до 2007 година, кога почнале да кружат гласини дека приватниот материјал пристигнал до „Vivid Entertainment“.

Тогашниот адвокат на Ким поднел тужба против „Vivid“, наводно во обид да ја запре објавата, но не успеал. Снимката под наслов „Kim Kardashian Superstar“ била објавена на 21 март 2007 година, а „главната актерка“ еден месец подоцна се спогодила во случајот.

Основачот на „Vivid Entertainment“, Стивен Хирш, изјавил за „Page Six“ во 2017 дека не се договорил со Ким или Крис, експлицитно напоменувајќи дека, кога првпат му ја покажале снимката, „Ким не била вмешана во тоа“.

Кружеле гласини дека Ким и Реј Џеј морале да потпишат договор пред снимката да биде објавена и дека за тоа добиле околу пет милиони долари.

Ким станала планетарна медиумска ѕвезда и една од најбогатите. И покрај тоа, за многумина цената што ја платила за да се прослави била крајно неразумна и недозволива.

Крис на детектор за лаги

Ни Крис ни Ким, изгледа, немаат проблем со тоа. А Реј Џеј и понатаму негодува. Раперот од почеток тврди дека снимката никогаш не била во негов посед.

„Никогаш не ја имав снимката дома — таа ги имаше сите. Секогаш ги чуваше снимките во кутија за чевли на ‘Nike’ под својот кревет. Помислував на самоубиство, затоа што кога знаеш дека нешто е вистинито и гледаш како целото семејство создава империја од лагата што ја создадоа, тоа е срцепарателно и безобразно кон сите што биле искрени и верни на својот занает“, зборувал тој, па ѝ порачал на Ким: „Седевме со твојата мајка и сè ова го испланиравме заедно. Знаеш што направивме! Твојата мајка го контролираше целиот договор околу секс снимката“.

Тврдел дека Џенер дури ја избрала верзијата во која Ким изгледа најдобро за да ја пуштат во јавност.

Крис пред неколку години гостувала во емисијата на Џејмс Корден, „The Late Late Show“, каде што била подложена на детектор за лаги.

На прашањето: „Дали ѝ помогнавте на Ким да го објави видеото?“ одговорила: „Не“, а детекторот покажал дека нејзиниот одговор е вистинит. Раперот исто тогаш изјавил дека тестирањето било наместено.