Во утринската програма на Канал 5 Телевизија, Ивана Лескароски ја отвори својата душа и ја раскажа приказната што ја потресе целата јавност. Со мирен, но треперлив глас, Ивана зборуваше за болката што ја носи со себе, но и за неверојатната сила со која продолжува да чекори низ животот.
Таа искрено раскажа за најтешките моменти, за загубата на своите две деца, за моментот кога ја слушнала најстрашната вест што една мајка може да ја чуе, и за шокот кој, како што рече, „не се заборава никогаш“.
„Сè уште го паметам тој ден, тие зборови. Тоа беше хорор кој не се заборава,“ рече Ивана, додека публиката и гледачите со солзи ги следеа нејзините зборови.
Но нејзината приказна не завршува во темнина. Ивана зборуваше и за својата борба со рак на тироидната жлезда, како и за секојдневната грижа за нејзиниот син Роман, кој се соочува со пет различни дијагнози и долг пат на терапии. И покрај сè, таа не дозволува болката да ја скрши.
„Имаш моменти кога мислиш дека си на крајот, дека нема повеќе сила… а токму тогаш сфаќаш дека Бог ти ја дал за тие денови. Да издржиш“, искрено сподели Ивана, оставајќи ги без зборови и водителките и гостите.
Во студиото владееше длабока тишина, полна со емоции и човечка топлина. Покрај Ивана, гости беа и членовите на Силви Бенд, Силвана Муциќ Плевнеш и Влатко Плевнеш и деканот на ФИНКИ, Петре Ламески, кои ја слушаа со големо внимание и емпатија. Во еден момент, додека Ивана зборуваше, Силви не можеше да ги задржи солзите и јавно ѝ упати зборови во знак на поддршка. Тој миг ја обои целата емисија со вистинска човечност. момент што зборува повеќе од илјада зборови.
По емисијата, социјалните мрежи беа преплавени со пораки на поддршка, љубов и восхит кон Ивана. Гледачите ја нарекоа „вистинска хероина“, жена која со својата храброст и искреност покажува дека дури и кога животот те скрши, можеш повторно да се издигнеш, посилна, посвесна и полна со љубов.
Автор: Ц.Н.
