Чаби Алонсо и фудбалерите на Реал Мадрид нема да бидат премногу задоволни од начинот на кој ја пречекуваат репрезентативната пауза, бидејќи после поразот од Ливерпул во европското дерби, „кралевите“ вчераа имаа кикс и во домашното првенство против Рајо Валјекано.
Реал четврта сезона по ред не го победи градскиот ривал на негов терен и вчера одигра со најнепопуларниот резултат (0:0), па во ситуација кога во Мадрид се нема големо трпение за лоши и бледи изведби на мадридскиот великан, Алонсо мораше да одговара на прашања кои не беа баш најпријатни за него.
Неговиот тим изгледаше доста безидејно на моменти како што беше случај и на „Енфилд“, а бидејќи после паузата следат неколку натпревари на гостински терен, тимот ќе има доста работи за поправање на првиот комплетен собир после десет дена.
– Секогаш сме подготвени за тешки натпервари, а така беше и сега. Рајо се покажа како незгоден ривал изминатите години, а така беше и сега. Имавме проблеми да го отвориме резултатот, натпреварот донесе доста транзиции на двете страни и на крајот беше доста неизбалансирано, можеше да падне гол на двете страни.
– Прифаќаме позитивна и конструктивна критика, но јас сум загрижен само за растот кој треба да го имаме како тим. Сите знаеме каде се наоѓаме, знаеме на кое место сме и знаеме што сакаме да постигнеме. Се наоѓаме само во месец ноември, не чека долг пат до крајот на сезоната. Мораме да бидеме амбициозни и да бараме повеќе од себе, но исто така, мора да останеме и мирни во вакви ситуации.
– Ова е Реал Мадрид, ќе има добри и лоши времиња, но мора да го одржиме балансот. Сезоната е долга и барањата се исклучително високи, но ние планираме да исполниме голем дел од нив, – изјави Чаби Алонсо.
