Очекувано, ал-Шара ќе побара целосно укинување на преостанатите санкции воведени кон неговата разурната земја од војната, пишува „The Guardian“.

Ахмед ал-Шара, чиите исламистички бунтовнички сили на крајот на минатата година го соборија долгогодишниот владател Башар ал-Асад, се обидува да го убеди американскиот претседател да ги поништи економските ограничувања воведени за време на тринаесетгодишната граѓанска војна, тврдејќи дека тие повеќе немаат оправдување.

Неговиот медиумски советник, Ахмад Зејдан, за саудиската телевизија „Al Arabiya“ изјави дека најважно прашање на дневен ред е укинувањето на Законот за заштита на цивилите во Сирија (Caesar Act) од 2019 година, кој воведе сеопфатни санкции поради прекршувања на човековите права од страна на режимот на Асад.

Трамп го нарече „борец“

Трамп за првпат се сретна со сирискиот лидер минатиот мај во Ријад. Пред средбата, тој го пофали пред новинарите како „млад, привлечен човек. Жилав тип. Со силно минато. Многу силно минато. Борец“.

По таа средба, Трамп нареди укинување на поголемиот дел од санкциите, што претставуваше драстичен пресврт во американската политика.

Сепак, „Caesar Act“ и натаму останува на сила, а за негово трајно укинување ќе биде потребно гласање во Конгресот.

Тоа е неверојатен пресврт за ал-Шара – поранешен водач на бунтовничка група која го предводеше соборувањето на Асад, а за чија глава американската влада своевремено нудеше награда од 10 милиони долари.

Минатиот четврток, Вашингтон го предводеше гласањето во Советот за безбедност на ОН за укинување на санкциите против него лично. Во септември, ал-Шара — некогашен џихадист поврзан со ал-Каеда — стана првиот сириски претседател во повеќе децении што се обрати на Генералното собрание на ОН во Њујорк.

САД очекува помош од Сирија против Исламската држава

„Имаме голема мисија – обнова на економијата“, изјави тогаш ал-Шара. „Сирија има разновидна работна сила. Луѓето сакаат да работат, тоа им е во гените. Затоа, само укинете ги санкциите и ќе ги видите резултатите“, порача тој.

Според проценките на Светската банка од октомври, трошоците за обновата на Сирија изнесуваат најмалку 216 милијарди долари.

Американското Министерство за надворешни работи пред три дена го отстрани ал-Шара од црната листа на терористи, а се очекува дека за време на посетата на Вашингтон, Сирија ќе ѝ се приклучи на коалицијата против Исламската држава предводена од САД.

Сириските сили за безбедност веќе овој месец спровеле 61 рација низ земјата, насочени против Исламската држава. Притоа се уапсени 71 лице, а е запленета поголема количина експлозив и оружје, соопшти сириското Министерство за внатрешни работи.

Израел е против укинувањето на санкциите

Во услови на затоплување на односите, портпаролот на Стејт Департментот, Томи Пигот, потврди дека владата на Ахмед ал-Шара ги исполнува американските барања, вклучувајќи соработка во потрагата по исчезнатите Американци и отстранување на преостанатото хемиско оружје.

„Овие чекори се преземаат како признание за напредокот што го покажа сириското раководство по заминувањето на Башар ал-Асад и повеќе од педесет години репресија под Асадовиот режим“, рече Пигот.

Ал-Шара и неговиот тим вложуваат големи напори да се прикажат како умерени политичари подготвени да отворат нова ера на мир и просперитет за земја разурната од тринаесетгодишна војна, како и да соработуваат конструктивно со регионалните сили.

Сепак, израелската влада се спротивставува на целосното укинување на американските санкции, оценувајќи дека Вашингтон би изгубил клучна полуга на влијание во преговорите со Дамаск.

Иако Израел и Сирија формално сè уште се во војна, а Израел ја окупира сириската Голанска висорамнина, Трамп изрази надеж дека двете земји би можеле да ги нормализираат односите.