Боксерската легенда Мајк Тајсон откри досега најконкретни информации за својот долгоочекуван дуел со Флојд Мејведер, најавувајќи дека борбата би можела да се одржи веќе на почетокот на следната година. И покрај шпекулациите за можен реванш помеѓу Мејведер и Мени Пакјао, Тајсон верува дека неговиот влез во рингот со непоразениот шампион никогаш не бил поблизок, пренесува "bloodyelbow.com".
Тајсон целосно фокусиран на март
Поранешниот светски шампион во тешка категорија, кој не ја исклучува ниту можноста за реванш со Џејк Пол, изјави оваа недела дека би можел да се соочи со Мејведер во март 2026 година.
Додека боксерските кругови зборуваат за можен договор за втор меч меѓу Мејведер и Пакјао, Тајсон даде јасен временски рок за својот судир со боксерската мегаѕвезда која зад себе има перфектен скор од 50-0.
„Немам поим, можеби во март или април“, изјави Тајсон за "Hard Rock Bets" во врска со борбата со Мејведер. „Така изгледа, токму како што очекував. Изгледа дека ќе биде нокаутиран.“
„Ова го крева боксот на ново ниво“
Говорејќи за своето долгогодишно ривалство со боксерот од Мичиген, Тајсон остана воздржан во врска со деталите од нивното минато, но нагласи дека нема лоша крв меѓу нив.
Сепак, храбро изјави дека нивниот дуел ќе биде најголемата борба во кариерите на двајцата, толку голема што, според него, ќе го промени светот на боксот засекогаш.
„Веројатно ќе ја надмине секоја моја претходна борба. Таа има потенцијал за тоа. И ова е навистина сериозно“, рече Тајсон и додаде:
„Ќе ги надмине сите борби и сета слава што тој (Мејведер) ја имал досега. Ова го крева боксот на едно ново, речиси божествено ниво.“
