Имено, Деј Луис изрази изненадување што бил, како што рече, „неволно вовлечен“ во несогласување со Кокс, откако шкотскиот актер го нарече неговиот омилен актерски стил „американско с*ање“, пишува „Daily Mail“.

Деј Луис смета дека Кокс го вклучил во несакана дебата за методската глума („method acting“). Во неодамнешно интервју за британскиот магазин „Big Issue“, 68-годишниот Деј Луис рече дека бил „ненамерно“ вовлечен во дискусиите за овој популарен актерски пристап.

Сè започнало кога Кокс (79) во интервју за „Variety“ во 2023 година алудирал дека неговиот колега од хит-серијата „Succession“, Џереми Стронг, почнал да ја истражува методската глума откако поминал време со Даниел Деј Луис.

„Тоа е навистина културен судир. Не ги поднесувам сите тие американски с*ања, жал ми е. Сите тие ‘Мислам, значи чувствувам’. Само работи ја работата. Не се идентификувај премногу“, изјави тогаш Кокс.

„Слушајте, еднаш работев со Брајан Кокс и некако се најдов втурнат во овој конфликт. Брајан е навистина добар актер кој прави извонредна работа. Како резултат на тоа, доби говорница... од која, изгледа, нема намера да слезе. Секогаш кога ќе посака да разговара за тоа – лесно ќе ме најде“, изјави Деј Луис.

Овие двајца актери, кои сега се во затегнати односи, соработуваа на филмот „The Boxer“ од 1997 година. Кокс претходно изјави дека импресивниот актерски процес на Деј Луис делумно бил причина за неговата пауза од глумата, како и дека тој стил влијаел врз Џереми Стронг, кој во тоа време бил непознат актер на сетот од истиот филм.

„Се разбира, Џереми беше асистент на Даниел. Значи, сè тоа го научи од него“, рече тогаш Кокс.

Што е всушност методска глума?

Тоа е интензивна актерска техника преку која актерот се обидува да ги канализира внатрешните мотивации и емоции на ликот користејќи животни искуства. Кокс, пак, ја критикува оваа метода како „ригиден процес“ што го применувале и легендарни актери како Марлон Брандо, Роберт Де Ниро и Кристијан Бејл, а влијанието на Стронг го наведе како пример за тоа зошто овој стил е, како што рече, „е*ено здодевен“, пренесува „Variety“.

„Да мислев дека на каков било начин се мешам во неговиот работен процес, би бил згрозен. Но, не верувам дека било така. Џереми Стронг е одличен актер – не знам како пристапува кон работата, но не чувствувам никаква одговорност за тоа“, објасни Деј Луис.

Тој додаде: „Ми пречи што методот често се погрешно претставува. Не можам да се сетам на ниту еден коментатор кој зборувал за него, а навистина да знае што стои зад таа техника. Луѓето се фокусираат на приказни како ‘Живеел шест месеци во затворска ќелија’. Тоа се најмалку важните детали. Во сите изведувачки уметности, луѓето ги пронаоѓаат своите методи како средство за постигнување на целта“.

Деј Луис нагласи дека ваквиот вид глума претставува „ослободување на себеси за да им прикажете на своите колеги вистинско, живо човечко суштество со кое можат да комуницираат“.

„Многу е едноставно. Затоа ме нервира целата таа приказна ‘Ох, тој ја користи методата’. Што, по ѓаволите, знаете вие за тоа?“, праша актерот, додавајќи дека таа техника често погрешно се поврзува со идеја за некакво лудило.

Пред две години, на истата тема се огласи и самиот Џереми Стронг во интервју за списанието „GQ“. Тој рече дека никогаш директно не разговарал со Кокс ниту со останатите колеги од серијата „Succession“ за својата методска глума.

„Секој има право на сопствени емоции. Исто така мислам дека Брајан Кокс има право да каже што сака. Нема потреба од некакво ‘санирање штета’...“, изјави тогаш Стронг, додавајќи дека никогаш не размислувал да го промени својот начин на работа.

„Дали ќе го приспособам или компромитирам начинот на кој работам цел живот и во кој верувам? Ниту најмала шанса“, додаде актерот.

Деј Луис сега се враќа на големото платно со филмот „Anemone“, кој го напишал и режирал неговиот син Ронан – осум години откако најави второ повлекување од филмската индустрија.