Хуманоидниот робот "Atlas" доби напредни "раце" со „протопалец“, благодарение на кои во новото видео прецизно фаќа, ротира и пренесува предмети – речиси исто како човечка рака. Со овој чекор, хуманоидот станува сè поблиску до реални индустриски задачи во фабрики и магацини.
Компанијата „Boston Dynamics“ го претстави новиот „gripper“ – систем на фаќање за електричната верзија на Atlas: тропрстен механизам со палец и значително поголем опсег на движења. Идејата зад дизајнот е едноставна – „доволен број на прсти“ за што поширок спектар на задачи, од фаќање рамни кутии и цилиндри до прецизни ротации на мали делови, сето тоа со доволна издржливост за индустриски услови.
Видеото демонстрира дека "Atlas" сега може многу побезбедно да префрла, врти и порамнува товар, без потреба од комплицирани и кревки механизми.
За оние што не се од „струката“, ова значи нешто мошне едноставно: помалку паѓање на предмети и повеќе „човеколики“ движења. Новиот палец овозможува стисок налик човечкиот, со што роботот може полесно да фати лизгави или неправилни предмети и да ги постави со голема прецизност.
Во комбинација со напредокот во софтверот и системите за планирање на движења, "Atlas" може да изведува серија мали, но исклучително важни дејства – од подигање предмети од подот до нивно прецизно редење – без спектакуларни скокови и акробации што публиката ги памети од неговите порано вирални видеа.
Иако "Atlas" засега останува истражувачка платформа, токму ваквите „раце“ се клучниот чекор за пренос на хуманоидите од лабораториите во реалните работни средини – логистика, производни линии, сервисни задачи.
Компанијата „Boston Dynamics“ сè повеќе се насочува кон прагматичен дизајн: што помалку прсти што покриваат што повеќе сценарија, со повисока сигурност и полесно одржување.
Иако шегите со „Терминаторот“ се неизбежни, целта на инженерите е многу приземна – безбедна и ефикасна манипулација со предмети, а не замена на луѓето, особено во заморни и повторувачки задачи.
