Тим канадски научници пронајде можна поврзаност помеѓу загадувањето на воздухот од фосилни горива и зголемениот ризик од амиотрофична латерална склероза (АЛС), фатална невродегенеративна болест.

Студијата, објавена во списанието „Environmental Research“, опфати 304 лица со АЛС и 1207 здрави лица на слична возраст и пол, користејќи податоци за животната средина за проценка на долгорочната изложеност на загадувачи на домашните адреси на учесниците во истражувањето.

Научниците се фокусирале на сулфур-диоксид (SO₂), нуспроизвод од согорување јаглен и нафта. Иако е познато дека SO₂ го оштетува мозокот, досега не бил проучуван во контекст на АЛС. Тимот откри дека лицата со АЛС имаат значително подолга историја на изложеност на SO₂ од здравите лица.

Истражувањето покажа дека сите учесници живееле во подрачја кои официјално се класифицирани како зони со „чист воздух“, што го доведува во прашање постоечкото ограничување на дозволените нивоа на загаденост.

Смрт во рок од три години

„Нашите наоди ја поддржуваат врската меѓу долготрајната изложеност на загаден воздух, особено на сулфур-диоксид, и развојот на АЛС, како и потребата од подобрување на мерките за контрола на загадувањето на воздухот“, изјавија авторите на студијата.

Истражувачите исто така забележале дека изложеноста на SO₂ пред појавата на симптомите е поважна од онаа што е измерена поблиску до времето на дијагнозата.

„Ова е првата студија која покажува дека повисоки нивоа на амбиентален SO₂ во станбени подрачја го зголемуваат ризикот од АЛС“, заклучуваат авторите на студијата.

Иако АЛС останува ретка болест, која погодува околу едно до две лица на 100.000 луѓе годишно, во најголем дел од случаите е фатална во рок од три години.

Канадските научници повикуваат на понатамошни истражувања и предупредуваат дека е потребна превентивна стратегија и подобрена регулаторна интервенција во интерес на јавното здравје во врска со нивото на изложеност на загадување на воздухот, пишува „Science Alert“.