Таков е патот на Мартинијан Кириловски, млад пејач од Куманово, кој денес ја освојува публиката со својот глас, но зад таа самоувереност стои борба што малкумина ја знаат.

„Долго време мојата говорна маана беше мојот тивок сопатник“, раскажува Кириловски.

„Нешто што ме кочеше, што ми ја земаше сигурноста и ме тераше да се прашувам дали некогаш ќе можам да застанам пред луѓе и да бидам разбран, слушнат и прифатен“.

Моментите на тишина

Мартинијан вели дека имало денови кога тишината му изгледала побезбедна од зборовите.

„Имаше моменти кога се чувствував како да сум заробен во сопствените зборови“, признава. „Стравот дека ќе згрешам, дека некој ќе се насмее, беше посилен од желбата да кажам што навистина чувствувам“.

Но, во таа тишина, се раѓала музиката. „Најубаво се изразувам преку музиката – искрено и емотивно. Таа е мојот јазик на слобода, мој начин да кажам сè што понекогаш зборовите не можат“, вели тој.

Од трнлив пат до мотивација

Со текот на времето, она што го кочело – го изградило.

„Токму тој предизвик ме научи дека силата не е во тоа да бидеш совршен, туку да продолжиш и кога не е лесно“, споделува Мартинијан. „Да се соочиш со своите маани и да ги претвориш во гориво за уште поголема борба“.

Така, од момче кое избегнувало да зборува, станал човек кој денес стои на сцена и пее пред публика. Говорната маана ја прифатил како дел од себе – не како пречка, туку како потсетник колку може човек да издржи.

„Таа е дел од мојата вистинска приказна – приказна во која падовите ме направија посилен, а пречките ми станаа патокази кон успехот“.

Да не се откажеш – тоа е победа

На прашањето што го движи, вели дека најголема желба му е луѓето да го паметат по неговата искреност.

„Сакам да ме гледаат како човек кој не се плаши да покаже емоција, да признае дека патот кон успехот не секогаш е праволиниски. Сакам да ме паметат по тоа што не сум се откажал, дури и кога животот изгледал како да ми поставува ѕидови пред секој чекор“.

И навистина, неговата приказна звучи како песна што почнува тивко, но завршува со моќен рефрен.

Мартинијан Кириловски е роден во Куманово во 1996 година. Со музика почнал да се занимава од рана возраст, настапувал на фестивали и телевизиски програми, а македонската јавност го запозна по настапите на „Макфест“, каде што го освои вниманието со својот топол вокал и искрен настап.

Но повеќе од тоа – тој е доказ дека уметноста не се мери со совршенство, туку со искреност. Секој негов настап е мал потсетник дека најубавите нешта во животот се раѓаат токму од оние борби што најмногу нè болат.

„Ова сум јас“

Денес, Мартинијан низ насмевка кажува:

„Ова сум јас, со сите свои падови и победи. И ако мојата приказна може да охрабри барем еден човек да не се срами од својата мака – тогаш веќе сум успеал“.

Приказната на Мартинијан Кириловски нè потсетува дека храброст не значи да немаш страв – туку да продолжиш и кога тој е присутен. 

Автор: Ц.Н.