На пример, поголемата консумација на преработено и црвено месо е поврзана со поголем ризик, додека исхраната богата со растителни влакна може да помогне во неговото намалување. Исто така, постојат докази дека млечните производи, особено оние богати со пробиотици, може да имаат заштитен ефект, додека честото консумирање алкохол го зголемува ризикот.

Затоа истражувачите од Италија ги анализирале навиките во исхраната на речиси 2.000 пациенти и повеќе од 4.000 здрави луѓе. Тие особено го проучувале внесот на каротеноиди – пигменти присутни во овошјето и зеленчукот – и пронашле јасна врска. Се покажало дека поголемиот внес на каротеноиди значително го намалува ризикот од рак на дебелото црево.

Најголем ефект е забележан кај бета-каротенот. Консумацијата на храна богата со овој пигмент е поврзана со 40 отсто помал ризик од рак на дебелото црево и ректален карцином, пренесе „EatingWell“.

Зголемувањето на внесот на храна богата со каротеноиди може да биде едноставен и ефикасен начин за намалување на ризикот од заболување

Покрај бета-каротенот, алфа-каротенот, бета-криптоксантинот, лутеинот и зеаксантинот исто така покажале заштитни ефекти. Колку е поголем внесот, толку е помал ризикот, што укажува на силна и конзистентна врска помеѓу овие хранливи материи и здравјето на цревата.

Каротеноидите дејствуваат како антиоксиданти и помагаат во спречувањето на растот и ширењето на клетките на ракот. Во оваа студија, најчестите извори на каротеноиди биле моркови, цитрусни овошја, лиснат зеленчук, домати и грашок. Иако самиот метод на истражувањето има ограничувања, како што е потпирањето на диететски прашалници, резултатите даваат важни докази за улогата на растителните намирници во намалувањето на ризикот од рак.

Истражувачите заклучиле дека зголемувањето на внесот на храна богата со каротеноиди – како што се моркови, слатки компири, домати, спанаќ, кељ и цитрусни овошја – може да биде едноставен и ефикасен начин за намалување на ризикот од колоректален карцином. Со други зборови, колку повеќе светло обоени овошја и зеленчуци имате на вашата чинија, толку се поголеми шансите да го заштитите вашето здравје.