Симптоми на корона – нови варијанти и што носат

Според најновите податоци на британската Агенција за здравствена безбедност („UKHSA“), речиси 90% од новите случаи во Велика Британија припаѓаат на две варијанти – NB. 1.8.1 и XFG, познати под имињата „Nimbus“ и „Stratus“.

Податоците од минатиот месец покажуваат дека 77% од инфекциите се поврзани со варијантата XFG или нејзините сродни облици, додека 11% од случаите се однесуваат на NB. 1.8.1.

Од „UKHSA“ нагласуваат дека засега нема докази оти овие варијанти предизвикуваат потешки форми на болеста во споредба со претходните. Вирусот природно мутира и се менува, а со дополнителни податоци експертите ќе можат подобро да разберат како новите варијанти влијаат врз имунитетот и како најранливите може да се заштитат.

Најважно, според експертите, е сите кои се вакцинирани да ги примаат своите дози навреме, кога ќе дојде периодот за тоа.

Симптоми на корона – најнови препораки и што да очекувате

На почетокот на пандемијата во 2020 година, најчестите симптоми беа покачена температура, треска, сува и упорна кашлица и губење или промена на вкусот и мирисот. Со појавата на новите варијанти, симптомите се изменети и сè почесто наликуваат на обична настинка.

Експертите наведуваат дека новите варијанти на вирусот најчесто предизвикуваат:

• покачена температура

• упорна кашлица

• отежнато дишење

• замор и болки во телото

• главоболка и воспалено грло

• затнат нос

• губење на апетит, мачнина и дијареја

• промени во вкусот или мирисот

Варијантата „Stratus“ често предизвикува рапав или подлабок глас, додека „Nimbus“ може да предизвика остра болка во грлото, опишана како чувство на „сечење со жилет“.

Лицата кои имаат симптоми на респираторна инфекција, особено ако имаат висока температура, треба да избегнуваат контакт со ранливи лица и, ако е можно, да останат дома.

За оние кои не можат да останат дома, лекарите препорачуваат:

• носење добро прилепена повеќеслојна или хируршка маска

• избегнување турканици, јавен превоз и простории без вентилација

• физичка активност на отворено, без близок контакт со други

• покривање на уста и нос при кашлање или кивање

• често миење на рацете со сапун и вода или користење дезинфекциско средство

Пораст на бројот на случаи

Податоците на „UKHSA“ покажуваат пораст на процентот на позитивни тестови од 7,6% на 8,4% во рок од една недела, што укажува на зголемен број заразени. Хоспитализациите поради COVID-19 исто така се зголемени – од 2,00 на 2,73 на 100.000 жители.

Д-р Џејми Лопез Бернал, епидемиолог во „UKHSA“, изјави:

„Нивото на грип и COVID-19 полека расте. Ова е очекувано во овој период од годината, затоа е важно сите кои можат да се вакцинираат против зимските вируси – вклучувајќи ги грипот и COVID-19 – тоа да го направат навремено.“