Шпанија го започна првиот проект за електрични автобуси без возач во главниот град Мадрид, како дел од напорите за промовирање на еколошки и одржлив јавен превоз.
Како дел од проектот, кој го започна регионалната влада на Мадрид по повод Европската недела на мобилност (16-22 септември), во паркот Каса де Кампо се одржа првото пробно возење на електричен автобус без возач, пишува Анадолу.
Малиот автобус, кој сообраќа на кратка рута со само шест станици, има капацитет од 12 патници. Нормално може да достигне брзина до 40 километри на час, но за време на пробните возења ќе биде ограничен на 15 километри на час. Неговата батерија обезбедува осум до десет часа работа.
Франциско Санчез, директор на Одделот за електроника и паметна мобилност во CTAG (Galician Automotive Technology Center), изјави за Анадолу дека развиле возило за јавен превоз и сега започнале со пилот тестирање, додавајќи дека е дизајнирано за многу кратки растојанија од еден до пет километри.
Санчез рече дека слични пилот тестирања наскоро ќе започнат на Универзитетот во Виго во северна Шпанија, додавајќи дека овие возила нудат решенија за предизвиците во јавниот превоз и наскоро ќе станат конкурентни на пазарот.
Тој објасни дека автобусот не е наменет да ги замени градските автобуси долги 12 метри што се користат во моментов, туку би можел да се користи на места каде што големите возила не можат да сообраќаат, како што се градските центри, парковите, универзитетите и индустриските зони.
Поради важечките прописи во Шпанија кои забрануваат целосно автономен јавен превоз, надзорник за безбедност бил присутен за време на пробното возење.
Регионалната влада на Мадрид планира да ги пушти во редовна употреба ваквите електрични возила без возач од 2026 година.
