Иако се очекуваше двајцата лидери да користат сопствени лимузини, тие седнаа во американската и заедно пристигнаа на местото на одржување на средбата.

Станува збор за „Cadillac One“, попозната под прекарот „The Beast“ („Ѕвер“), специјално изработена за потребите на претседателот на САД, Доналд Трамп. Ова возило за првпат се појави во јавноста на денот на неговата инаугурација, на 20 јануари 2017 година, и оттогаш не престанува да биде тема кога и да се појави во него.

Ова специјално дизајнирано возило претставува вистинска подвижна тврдина, осмислена да обезбеди максимална заштита – во овој случај, заштита на Доналд Трамп.

Непробојна заштита и врвна опрема

Спецификациите на ова возило се импресивни: вратите се со дебелина од околу 20,32 сантиметри, изработени од комбинација на челик, алуминиум, керамика и други материјали. Прозорците се од 12,7 сантиметри дебело, повеќеслојно балистичко стакло.

„Ѕверот“ е опремен со бројни безбедносни додатоци: систем за испуштање чад, електрични рачки кои можат да испорачаат струен удар од 120 волти, распрскувачи на масло за попречување на напаѓачки возила, солзавец и систем за ноќно гледање.

Возилото е херметички затворено, со сопствен систем за дотур на чист воздух и кислород, како и фрижидер со резерви на крв од претседателот, од истата крвна група, за итни случаи.

Високо шифрирана комуникациска опрема овозможува претседателот никогаш да не биде недостапен. Се смета дека возилото има и други тајни способности кои се чуваат во строга доверливост.

Според проценките, изработката на „Ѕверот“ чинела околу 1,5 милион долари.

Долга традиција

Претседателите на САД користат „Cadillac“ возила повеќе од еден век. Уште во 1919 година, претседателот Вудро Вилсон се возел во лимузина „Series 53“ од 1916 година, за време на парада во Бостон по завршувањето на Првата светска војна.

Автомобили од други производители, исто така, им служеле на американските претседатели. Првиот претседател кој се возел во автомобил бил Вилијам Мекинли, кој наводно на 13 јули 1901 година користел парен автомобил од компанијата „Stanley Motor Carriage Company“.

Два „Cadillac“ кабриолети – „Кралицата Мери“ и „Кралицата Елизабета“, именувани по познатите прекуокеански бродови – им служеле на претседателите Рузвелт, Труман и Ајзенхауер.

Првпат користени во 1938 година, овие возила, долги 6.553 милиметри и тешки 3.474 килограми, биле опремени со арсенал оружје и муниција, двонасочни радио-уреди и генератори за работа во екстремни услови.