Во периодот од 21 до 27 јули 2025 година Управата за јавни приходи (УЈП) спроведе вкупно 154 теренски контроли за фискализација насочени кон разни типови деловни субјекти, меѓу кои: ресторани, кафе-барови, слаткарници, колонијали, продавници за облека и накит, месарници, цвеќарници, рибарници, туристички агенции, хотели и други трговски објекти за продажба на мало.
Контролите биле реализирани во државата во повеќе градови, меѓу кои и туристичките места, каде што во летниот период има зголемена фреквенција на туристи.
Од 154 контролирани субјекти, кај 34 %, односно кај 52 од контролираните се утврдени неправилности во согласност со Законот за регистрирање на готовинскиот промет. За утврдените неправилности донесени се 52 прекршочни санкции – глоби, кои ќе бидат одмерени во согласност со големината на субјектот. Кај пет даночни обврзници, поради повторено неиздавање фискални сметки во рок од две години, изречена е мерка за привремена забрана за вршење дејност. Привремено затворање објекти е изречено за три субјекти во Охрид, еден во Гостивар и еден во Струга, соопшти УЈП.
„Анализата на спроведените контроли и утврдените неправилности по градови е следна: •Во Скопје извршени се 43 контроли и утврдени се 9 неправилности; •Во Струга, Охрид и во Ресен извршени се 64 контроли, а утврдени се 10 неправилности во Струга, Охрид – 14, Ресен – 2 ; •Во Прилеп извршени се 5 контроли, a утврдени се 3 неправилности; •Во Струмица и во Дојран извршени се 12 контроли, а утврдени се 2 неправилности во Дојран •Во Тетово, Гостивар и во Кичево извршени се 15 контроли, а утврдени се 6 неправилности, од кои 4 во Тетово и по една во Гостивар и во Кичево; •Во Штип, Македонска Каменица и во Берово извршени се 15 контроли и утврдени се по 3 неправилности во Македонска Каменица и во Берово“.
УЈП со апел до сите даночни обврзници да постапуваат совесно и во согласност со законските прописи со цел да придонесат кон зајакнување на даночната усогласеност и унапредување на даночната дисциплина во државата.
Најавуваат дека Управата за јавни приходи врз основа на извршените контроли, во согласност со Законот за регистрирање на готовинските плаќања, ќе врши вкрстени проверки со цел да ја провери веродостојноста на искажаните приходи кај даночните обврзници.
„Издавањето фискални сметки и користењето мобилни фискални апарати не претставуваат само законска обврска – туку и клучен чекор кон правично, транспарентно и одговорно деловно опкружување. Управата за јавни приходи останува цврсто посветена на доследна примена на законите и обезбедување еднаков третман за сите даночни обврзници. Почитувањето на законските обврски е заедничка одговорност и темел на одржлив, функционален и фер даночен систем“.
