ВЛЕН алармира против, како што велат, сериозна, ниска и опасна провокација, оркестрирана од дестабилизирачкиот сојуз ДУИ – Левица – Данела Арсовска, кој се обидува да го запали огнот на меѓуетничката поделба во срцето на Скопје, преку, како што велат од ВЛЕН, скандалозното повторно поставување на споменикот на Андон Лазов-Ќосето, темна и насилна фигура што симболизира омраза, насилство и поделба.
„Ова не е наивен чин. Тоа е намерна, добро испланирана и длабоко антиалбанска провокација, која доаѓа од политичко трио опасно за мирот, стабилноста и внатрешната кохезија на земјата. ВЛЕН нема да молчи пред овој срам, ниту пак граѓаните повеќе ќе ги голтаат старите измами на ДУИ и нејзините партнери. Дали повторно сме сведоци на добро познатите дестабилизирачки сценарија што ДУИ ги активира секогаш кога е во политичка и изборна криза? Дали овој споменик е уште една стара карта што се користи за одвлекување на вниманието од целосниот неуспех на нивната влада, од корупцијата и политичкиот криминал што ги прогонува“, прашуваат од ВЛЕН.
Од коалицијата прашуваат и дали одлуката за враќање на Ќосето е донесена во канцелариите во Сарај, каде што сè уште работи заеднички „темен штаб“ на Арсовска и Блерим Беџети и кој ја дал наредбата за оваа, како што велат, провокација.
„Дали ДУИ молчеjќи го одобри овој чин за да го продолжи својот таен договор со Данела Арсовска? Во време кога градот Скопјe се дави во ѓубре, каде што стотици семејства и бизниси немаат ни вода да пијат, кога жештината го загрозува здравјето на граѓаните, овие тројца се справуваат со споменици и меѓуетнички тензии“, велат од ВЛЕН.
Од таму потсетуваат дека споменикот на Ќосето бил изграден со владини пари кога ДУИ биле на власт, а министрите Бујар Османи и Блерим Беџети го поддржале проектот.
