Присуството на претседателот на Соединетите Американски Држави, Доналд Трамп, на самитот на лидерите на НАТО промени сè, во споредба со самитите од претходните години, поместувајќи го фокусот од поддршката на Украина кон зајакнување на одбранбените капацитети на алијансата, изјави денес во Хаг, унгарскиот министер за надворешни работи Петер Сијарто.
Зборувајќи на прес-конференцијата по самитот, Сијарто рече дека ако сака да ја сумира разликата помеѓу овогодинешниот самит и оние од последните три години, тоа би било во два збора – Доналд Трамп, пренесува MTI.
Сијарто рече дека враќањето на Трамп на власт променило сè и дека сега секој може слободно да користи зборови како мир, примирје и мировни преговори, без страв од јавна осуда.
„Со Доналд Трамп, самитот конечно го имаше НАТО и зајакнувањето на одбранбените капацитети на трансатлантската заедница на дневен ред, наместо нереална поддршка за Украина и нејзиното членство во НАТО“, рече Сијарто.
Тој оцени дека завршната изјава од самитот е „невообичаено кратка“ со само осум страници, но сепак кажува повеќе и е подобра од претходната.
Сијарто рече дека завршната декларација ја потврдува посветеноста на земјите-членки на НАТО кон член 5 од основачкиот акт, како и кон член 3 за обврските за националните одбранбени капацитети.
