Организацијата на Трамп го претстави својот прв паметен телефон, наречен „T1 Phone“, по цена од 499 долари, со месечен мобилен пакет од 47,45 долари. Според официјалната најава, телефонот е „дизајниран и произведен во САД“, со планирано лансирање во септември 2025 година.

„Произведен во САД“? Експертите не веруваат

Аналитичарите ја оспоруваат ваквата изјава, оценувајќи ја како нереална – најголемиот дел од клучните компоненти (OLED екрани, VCSEL сензори) се произведуваат во Азија. Дури и "Apple", со сите ресурси, сè уште не успеа да ја префрли таа индустрија во САД.

Сомнителни спецификации и смешни грешки

Официјално најавените карактеристики – "Android 15", 5G, 3.5 mm приклучок, 12 GB RAM и 256 GB складиште – делуваат неизводливо за цена од 499 долари. Дополнително, официјалниот сајт за телефонот е преполн со граматички грешки. Еден од натписите вели: „5000 mAh долготрајна камера“, што дополнително го намалува кредибилитетот на производот.

Ребрендиран кинески модел?

Новинари, вклучително и од „The Verge“, укажуваат дека „T1“ најверојатно е ребрендиран кинески модел – конкретно, Wingtech/Revvl 7 Pro, кој на "Amazon" чини околу 170 долари.

„Цената од 499 долари за уред со неизвесни спецификации, без гаранција за поврат на парите, повеќе наликува на брендиран сувенир отколку на конкурентен производ на пазарот“, се наведува во коментарите.

Прескап пакет со слаба понуда

Месечниот пакет од 47,45 долари не нуди ништо што веќе не го нудат други оператори (како Boost или Visible) по значително пониски цени од 25 – 30 долари, што дополнително ја прави понудата неатрактивна.

Повеќе маркетинг, помалку технологија

„T1 Phone“ засега изгледа како краткотрајна маркетиншка кампања со многу медиумски врева, но со премногу нејаснотии околу реалната вредност и потекло на уредот. Сите кредибилни анализи и инсајдери упатуваат на тоа дека станува збор за претходно постоечки кинески уред, редизајниран и брендиран како американски, без вистинска технолошка иновација зад себе.

Целата приказна делува како „празна школка“ – многу врева, а малку суштина.