Рафаел Гроси, директор на Меѓународната агенција за атомска енергија (МААЕ), изјави дека израелските напади врз иранските нуклеарни постројки се „длабоко загрижувачки“ и предупреди за можните последици по човековата безбедност и животната средина.
„Постојано нагласував дека нуклеарните постројки никогаш не смеат да бидат нападнати, без оглед на околностите или контекстот. Ваквите напади имаат сериозни последици по нуклеарната безбедност, безбедноста и меѓународниот мир“, рече Гроси во изјава до одборот на директори на МААЕ.
Тој ги повика сите страни да покажат максимална воздржаност и предупреди дека секоја воена акција што ја загрозува безбедноста на нуклеарните постројки може да има сериозни последици не само за Иран, туку и за регионот и пошироко.
„Јасно е дека, и покрај сегашните воени дејствија и зголемените тензии, единствениот одржлив пат напред за Иран, Израел, регионот и меѓународната заедница лежи во дијалогот и дипломатијата, со цел да се обезбеди мир и стабилност“, рече тој.
Гроси додаде дека бил во постојан контакт со инспекторите на МААЕ во Иран, откако Израел објави дека го таргетирал „срцето“ на иранската нуклеарна програма.
