Синоќа во различни делови од Северна Ирска избувнале јавни немири, трета ноќ по ред, при што демонстрантите фрлале молотови коктели врз полицијата во жариштето на немирите во Балимена, додека спортски центар бил запален во градот Ларн.
Стотици маскирани демонстранти ја нападнале полицијата и запалиле куќи и автомобили во северноирскиот град Балимена во текот на претходните две ноќи на немири кои полицијата ги осуди како расистичко насилство.
Интервентната полиција и оклопните возила ги блокираа патиштата во Балимена вчера вечерта пред стотици насобрани луѓе. Околу дваесет маскирани млади луѓе фрлале камења, пиротехнички средства и молотови коктели врз полицијата, изјави очевидец за Ројтерс. Полицијата ја предупреди толпата веднаш да се разотиде и распореди водни топови против нив втора ноќ по ред.
Тули фрлени врз пливачки центар каде се одржувале часови по пливање
Интервентната полиција беше и во градот Ларн, каде што маскирани млади луѓе скршиле прозорци во спортски центар пред да го запалат, покажаа снимките на Би-би-си.
Во центарот се одржувале часови по пливање кога низ прозорците беа фрлени тули, принудувајќи го персоналот да се забарикадира внатре пред да избега низ задната врата, изјави за Би-би-си, Дени Донели, пратеник од „Alliance“.
„Нема апсолутно никакво оправдување за она што се случи во Ларн и мора да се осуди“, изјави радиото „Cool FM“ Гордон Лионс од Демократската унионистичка партија (ДУП), министерот на Северна Ирска одговорен, меѓу другото, за социјална политика, кој ја претставува областа.
Полицијата соопшти дека млади луѓе подметнале пожар на кружен тек во градот Њутаунаби, жариште на секташко насилство кое периодично избувнува во регионот под британска власт 27 години откако мировниот договор стави крај на речиси тридецениско крвопролевање.
Полицијата ја истражува материјалната штета како расно мотивирани злосторства
Насилството првично избувна откако двајца 14-годишници биле уапсени и се појавија на суд пред три дена, обвинети за обид за силување тинејџерка во Балимена. Обвиненијата им беа прочитани на романски јазик од страна на преведувач, а нивниот адвокат рече дека тие ги негираат, пренесе Би-би-си.
Полицијата ја истражува материјалната штета во Балимена, која има релативно голема имигрантска популација, како расно мотивирани злосторства од омраза. Две филипински семејства изјавиле за Ројтерс дека ги напуштиле своите домови во градот доцна во неделата, плашејќи се за својата безбедност откако автомобил бил запален пред нивниот дом. Британската и ирската влада го осудија насилството, како и локалните политичари.
