Холивудскиот актер Вал Килмер почина на 65-годишна возраст. Килмер почина од компликации предизвикани од воспаление на белите дробови во Лос Анџелес, потврди неговата ќерка, актерката Мерцедес Килмер, за „Њујорк тајмс“.
Килмер со години се бореше со рак на грлото, кој му беше дијагностициран во 2015 година. Роден и израснат во долината Сан Фернандо, стекна слава со улогата на Том „Ајсмен“ Казански во филмот "Top Gun" од 1986 година, каде што глумеше заедно со Том Круз.
Неговата филмографија вклучува незаборавни улоги како Док Холидеј во "Tombstone" (1993), Џим Морисон во "The Doors" (1991), како и Бетмен во "Batman Forever" (1995).
Во текот на кариерата, соработуваше со врвни режисери и толкуваше најразлични ликови – од помошникот на Роберт де Ниро во "Heat" (1995), до криминалецот Сајмон Темплар во "The Saint" (1997).
Критичарите често го сметаа за еден од најталентираните американски актери. Беше во брак со британската актерка Џоан Воли од 1988 до 1996 година. Освен ќерката, зад себе остави и син, Џек, кој исто така е актер.
