Германскиот суд вчера го осуди 53-годишниот Јилмаз Тозтуркан на три години затвор поради уцена на семејството на Михаел Шумахер.
Архитектот на уцената Јилмаз Тозтуркан и неговиот 30-годишен син Даниел Линс беа обвинети дека побарале 15 милиони евра од семејството на Шумахер за да не објават фотографии од легендата на Формула 1 по неговата тешка несреќа.
Таткото и синот од Вупертал се заканија дека ќе објават приватни фотографии и видеозаписи од седумкратниот Формула 1 шампион доколку не добијат пари. Нивната колекција содржи фотографии и снимки од Шумахер по тешката скијачка несреќа која му нанесе сериозни повреди на мозокот.
По несреќата Михаел никогаш повторно не беше виден во јавноста. Таткото Тозтуркан доби тригодишна затворска казна, додека неговиот син е осуден на условна казна од шест месеци.
Јилмаз и Даниел ги добиле фотографиите од приватен чувар кој работел во резиденцијата на Шумахер во Швајцарија. Чуварот, идентификуван како Маркус Ф., доби условна казна од две години.
Обвинителите заклучија дека поранешниот чувар на семејството ги продал фотографиите од Шумахер за, како што кажаа, сума од пет цифри.
Таткото и синот, кои го уценуваа семејството на Михаел, ја признаа вината и изразија жалење на вчерашното последно судење.
Денес
