Минатата недела беше објавена ваква можност, односно дека администрацијата на Бајден може да ја „комплицира“ ситуацијата за следната администрација, со тоа што дополнително ќе ја „оптовари“ Украина.

Меѓутоа, целата приказна околу ракетите со долг дострел е прилично збунувачка, и речиси невозможно е да се утврди што точно е вистина од медиумските извештаи. Затоа, потребно е да се разликуваат одредени аспекти.

Нема официјална потврда

Најпрво, Белата куќа официјално не го потврди укинувањето на забраната, но ниту го негираше. Ова укажува дека одлуката е донесена, но остануваат деталите. По два дена, Киев директно потврди дека дозволата е добиена.

Единствената условна официјална потврда дојде од Германија, чиешто влада објави дека добила известување од Вашингтон за укинување на забраната. Во меѓувреме, Унгарија и Словачка ја критикуваа одлуката, сметајќи ја за обид за нарушување на мировниот процес. Премиерот на Словачка беше остар, изјавувајќи дека „оној што ја поддржува одлуката на Бајден, го поддржува почетокот на Третата светска војна“.

Случајот со Велика Британија и Франција

Нејасноста околу приказната е потврдена и преку реакциите на Велика Британија и Франција. Овие држави, наводно, не дозволиле нивните проектили да се користат за напади, бидејќи претседателот Бајден не го одобрил тоа. Сепак, француските медиуми првично објавија дека дозволата е дадена, но написите подоцна беа отстранети. Значи, Киев не доби целосна дозвола да изврши напади врз цели на руската територија.

Во случајот со Велика Британија, се шпекулира дека таа донирала ракети или се подготвувала за тоа, но процесот бил запрен. Бидејќи ракетите имаат потреба од американска технологија за насочување, нивната употреба мора да биде одобрена од Вашингтон. Американските медиуми информираа дека дозволата се однесува исклучиво на напади во областа Курск.

Дополнително, се тврди дека ова е одговор на наводното воведување на севернокорејски трупи во областа. Сепак, на 19 ноември, Русија официјално објави дека Украина извршила напад на руска територија со американски ракети со долг дострел. Министерството за одбрана на Русија соопшти дека шест балистички ракети АТАКМС биле испукани во регионот Брјанск, што покажува дека забраната не се однесува само на Курск.

Што може да се очекува?

Иако сè уште не е сосема јасно, Киев доби дозвола да користи ракети со долг дострел за цели на руска територија. Киев ја поздрави оваа вест, но ваквата одлука веројатно нема да стане пресвртна точка во војната.

Претходното искуство покажува дека ваквите напади можат да предизвикаат значителна штета, но немаат суштинско влијание врз фронтовите. Воената и политичката динамика остануваат клучни, а Западот и Украина се свесни дека преминувањето на „црвените линии“ поставени од Кремљ може да предизвика руски одговор.

Западот, главно, реагира внимателно и инертно, дозволувајќи доволно време Кремљ да се подготви за секој потег. Овој модел се повторува и сега. Кремљ постојано инсистира на „црвени линии“, но не е јасно кога тие ќе доведат до целосна ескалација.