Доаѓањето на републиканецот Доналд Трамп на позицијата американски претседател отвора одредени перспективи за односите меѓу Русија и САД, изјави Владимир Џабаров, првиот заменик-шеф на меѓународниот комитет на Советот на Руската Федерација.
„Мислам дека се отвораат одредени перспективи за нашите односи. Се разбира, треба да имаме на ум дека Трамп е, пред сè, американски државјанин и дека за него интересите на САД се на прво место“, рече Џабаров, пренесува РИА Новости.
Истовремено, тој посочува дека изјавите на Трамп дека за 24 часа ќе ја прекине војната во Украина, сепак се од категоријата изборна реторика.
„Секако дека нема да може да го направи тоа за 24 часа, но факт е дека тој има таков став да стави крај на војната и да стави крај на сите војни што се водат во светот и за тоа зборуваше јавно“, истакна Џабаров.
Рускиот политичар рече и дека, со оглед на сегашните околности, Русија поинаку ќе ги оцени своите способности и условите за мировните преговори, но, како што нагласи, не примирјето, пренесува Танјуг.
Доналд Трамп, кој веќе беше претседател на САД по изборите во 2016 година, победи на претседателските избори на 5 ноември, со што стана првиот американски политичар од 19 век кој се врати во Белата куќа по четиригодишна пауза.
