Реал Мадрид како тим се уште е во фаза на консолидација по заминувањето на клучен фактор во играта како Тони Крос, па додека Карло Анчелоти го бара вистинскиот рецепт, мора да се нагласи дека засега еден играч се издвојува со својата пожртвуваност и лидерските капацитети.
Феде Валверде ја наследи „8-та“ на Крос и дополнително презема одговорност во првиот тим на „кралевите“, а уште во воведните два месеци покажа дека е подготвен уште повеќе да се жртвува за тимот.
Уругваецот важи за најголем борец во стартниот тим на Анчелоти и за играч кој може да одговори во повеќе улоги, но најголема вредност му е тоа што секогаш работи за тимот.
Валверде самиот вели дека нема проблем да истрча поголем број на километри и да ги поштеди своите соиграчи од нападот, а во дадената ситуација секако мисли на Винисиус, Мбапе и Родриго.
Немам проблем да работам повеќе во одбрана за моите напаѓачи. Едноставно има играчи кои нема потреба да се бранат. Мене лично не ми е проблем да трчам повеќе и да ги надополнам нашите напаѓачи. Секогаш би го правел тоа кога знам дека тие ќе имаат корист да бидат одморени во нападот. Добро е понекогаш да добиваме помош од напаѓачите во одбрана, но со нив е исто како со дефанзивците. Не може да очекувате од еден дефанзивец да биде офанзивно настроен во текот на цел меч, – вели Валверде.
