Нова студија открива: Шверцот на кокаин ги загрозува живеалиштата на повеќе од 60 видови птици

Активностите на нарко-картелите покриваат две третини од областа со 67 видови птици преселници, кои се размножуваат во САД и Канада во текот на летото, а се во Централна Америка во зима, според студијата објавена во „Нејч састејнабилити“ (Nature Sustainability), пишува „Фис.орг“.

„Кога трговците со дрога се протерани во оддалечените шумски области, тие ја расчистуваат таа област за да направат аеродроми, патишта и пасишта. Овие активности, како и борбата против нарко-картелите, доведуваат до уништување на шумите и загрозување на многу видови“, изјавила Аманда Родвалд, водечки автор на студијата и директор на Центарот за проучување на популациите на птиците во Лабораторијата за орнитологија на Универзитетот Корнел.

Научниците измерија различни карактеристики на централноамериканскиот пејзаж и концентрацијата на птици преселници за да ја истакнат неочекуваната поврзаност помеѓу социјалниот проблем и биодиверзитетот.

Повеќе од половина од светската популација од една петтина од птиците преселници населуваат области кои се привлечни за нарко-картелите по притисокот од полицијата, што се мери според количината на запленет кокаин.

Најголемите шуми во Централна Америка се област која се соочува со зголемено ниво на трговија со кокаин.

„Политиката на САД против наркотици во Централна Америка се фокусира на снабдувањето, така што притисокот на полициските агенции игра значајна улога во движењето на патиштата за дрога и локацијата на нарко-уништувањето на шумите. По 40 години, јасно е дека овој пристап не функционира. Всушност, продажбата на кокаин се прошири и се создаде глобална мрежа. Во минатото, кокаинот поминуваше само низ Централна Америка, но сега стана центар на глобалниот транспорт на дрога“, додал коавторот на студијата Николас Маглиока, професор на Универзитетот во Алабама.