Присуството на навивачи на трибините за време на Европското првенство очекувано го зголеми ризикот за пренесување на коронавирусот меѓу присутните гледачи, а данските власти денеска објавија конкретен случај.
Тројца дански навивачи се заразиле со ковид-19 и тоа со делта сојот за време на дуелот меѓу Данска и Белгија кој се играше во Копенхаген.
Одговорните во скандинавската земја велат дека навивачите не се поврзани меѓу себе и се водат како индивидуални случаи, но јасно е дека изворот/изворите на вирусот биле на трибините.
Педантните Данци потврдија дека се регистрирани 29 позитивни тестови на ковид-19 поврзани со трите натпревари од Европското првенство кои се играа во Копенхаген, а покрај изолацијата на заразените и нивните блиски контакти, здравствените власти повикале и голем број навивачи на тестирање.
Информацијата за трите конкретни случаи од последниот натпревар доаѓа во пресрет на гостувањето на Данска во Амстердам, каде данските навивачи ќе имаат пристап до стадионот и ќе можат да го следат осминафиналето против Велс.
