Министерот за надворешни работи, Бујар Османи попладнево реагираше на одлуката на Русија да протера еден македонски дипломат.
Според Османи, ова ќе влијае негативно на односите меѓу Македонија и Русија.
„Жалам за неоправданата одлука на Министерството за надворешни работи на Русија, ова е само возвратна политичка одлука. Ова несомнено ќе влијае негативно на билатералните односи помеѓу Северна Македонија и Руската Федерација“, напиша Османи на Твитер.
Regrets for the unjustified decision of @mfa_russia, merely a retaliatory political decision; this will undoubtedly have negative influence on the bilateral relations between the Republic of North Macedonia and the Russian Federation https://t.co/64sD79WZYE
— Bujar Osmani (@Bujar_O) June 10, 2021
Откако во мај најави контрамерка на протерувањето на руски дипломат од земјава, руското МНР денеска соопшти дека ја повикале в.д. амбасадорката на Северна Македонија за да ѝ врачат нота со која еден од вработените во македонската амбасада во Москва во прогласуваат за персона нон грата.
Протерувањето на рускиот дипломат од земјава, пак, се случи на 14-ти мај кога амбасадорот на Русија, Сергеј Александровиќ Баздикин, беше повикан во македонското МНР за да му ја соопштат одлуката. Како причина за протерување на дипломатот беа посочени активности што не се во согласност со однесувањето кое се очекува од странски дипломат што служи во земјата домаќин.
