Американското Федерално истражно биро (ФБИ) и Министерството за внатрешна безбедност денеска предупредија дека хакерите кои ги поддржува кинеската влада можеби се обидуваат да ја украдат работата на американските истражувачи за развој на вакцина и лекови против коронавирус.
Тие две агенции денеска објавија предупредување за потенцијална закана. Тие издадоа слично предупредување и на почетокот на овој месец, пренесува „AP“.
Во заедничкото соопштение се наведува дека напорите на Кина претставуваат 'сериозна закана' за здравствениот, фармацевтскиот и истражувачкиот сектор.
„Обидот на Кина да цели на тие сектори претставува сериозна закана на одговорот на нашата земја на Ковид-19“, се наведува во соопштението.
Хакерите, но исто така и истражувачите и студентите, според американската администрација се активни во крадење на информациите во рамки на универзитетските институти и јавните лаборатории каде што работат, пренесува „Франс прес“.
ФБИ и Агенцијата за сајбер безбедност, соопштија дека ќе ги објават техничките детали и закани во наредните денови и барале од организациите да пријават било каква сомнителна активност.
Американските власти веќе долго време се жалат дека Кина преку хакирање краде академски и економски податоци за да ја зајакне својата економија.
Ова предупредување е издадено во период кога расте тензијата помеѓу американската и кинеската влада околу потеклото на пандемијата и почетниот кинески одговор на неа.
