Специјалецот Игор Спасов, кој е осуден на 14 години затвор за убиството на Мартин Нешковски, од денеска се бара со потерница на територијата на Македонија.
Портпаролот и судија во Основниот суд во Штип, Јулијана Неткова за МИА информирала дека надлежните од МВР и СВР-Штип ги информирале оти Спасов од петокот до денеска не е најден на подрачјето на Општина Штип.
„Игор Спасов не е пронајден и е недостапен на органите на прогон. СВР-Штип го извести Судот дека тој е недостапен и е во бегство, поради што Судот веднаш издаде согласност за издавање на потерница за негово пронаоѓање на територијата на Република Северна Македонија”, изјавила Неткова.
Таа додава дека доколку истражните органи не го пронајдат и на територија на државата, повторно се известува Судот, кој дава согласност за издавање на меѓународна потерница.
Спасов е осуден на 14 години затвор за убиството на момчето Мартин Нешковски вечерта на прославата на ВМРО-ДПМНЕ по победата на парламентарните избори. Казната затвор ја издржува од 2011 година, а во прекин му е од лани поради здравствени проблеми. Тој требаше да се јави во Затворот „Идризово” на 18 октомври.
