Ексдиректорот на УБК, Сашо Мијалков, излегува од затворот во Шуто Оризари и оди во куќен притвор бидејќи Апелациониот суд Скопје му ја уважи жалбата по предметот „Титаник 2“.
Во меѓувреме, Врховниот суд сè уште не му ја разгледал жалбата за укинување на мерката куќен притвор во истрагата за предметот „Империја“.
Од затвор излегува и Бедредин Ибраими и оди во домашен притвор, а на Анета Стефановска ѝ е определена мерка претпазливост. Жалбите на Сашо Срцев и Влатко Сајковски судот ги одби како неосновани.
Поранешниот шеф на тајната полиција, Сашо Мијалков, за случајот „Титаник 2“ беше осуден на 3 години затвор бидејќи побарал и издејствувал поништување регуларни резултати на три гласачки места за време на изборите во 2013 година. Судот го прогласи виновен за примање награда за противзаконито влијание.
Највисока казна, четири и пол години затвор, доби тогашниот член на ДИК од партијата ДПА, Бедредин Ибраими.
Лидерот на ДПА, Мендух Тачи, доби три години и два месеца затворска казна.
Жалбите на обвинетите В.С. и С.С. се одбиваат како неосновани.
