Премиерот Зоран Заев во делот на својата агенда од учеството на Минхенската конференција за безбедност, се сретна со поранешниот потпретседател на САД, Џо Бајден.
Како што информираат од владината прес-служба, Бајден упатил силни честитки за статусот поканета земја во НАТО и изразил цврста подготвеност да ја поддржи ратификацијата на Протоколот во американскиот конгрес, како и да ги охрабри парламентарните претставници на другите земји членки на НАТО, истото да го направат колку што е можно побргу.
Поранешниот потпретседател на САД нагласил и дека успехот на Република Северна Македонија е успех и на политиките на САД и на Европската Унија и дека се радува на денот кога ќе биде заокружена ратификацијата на Протоколот и кога Северна Македонија ќе стане еднаков по важност партнер со другите сојузници во НАТО.
Двајцата соговорници на средбата ги потврдиле и идните перспективи за соработка меѓу САД и Република Северна Македонија во повеќе области, со посебен нагласок на прашањата од заедничките безбедносни политики.
Премиерот Заев и членовите на владината делегација – министерката за одбрана, Радмила Шекеринска и министерот за надворешни работи, Никола Димитров, на средбата ја изразиле својата и благодарноста на граѓаните за поддршката што низ целиот процес на решавање на спорот со Грција доаѓал од страна на САД и нивните највисоки претставници.
