Претседателот на Венецуела, Николас Мадуро, го прогласил почетокот на најголемите воени-цивилни вежби - "Двесте години Ангостура 2019" - во историјата на таа земја, во која ќе учествуваат припадници на редовната војска и резервисти.
Пред почетокот на воените вежби претседателот пристигнал во државата Миранда, која се наоѓа во близина на Каракас, каде извршил инспекција на воената техника, вклучувајќи ги и ракетните системи од руско производство.
Воените вежби ќе се одржат од 10-ти до 15-ти февруари како што претходно соопштил Мадуро, тие ќе бидат најголеми во историјата на Венецуела.
На 15-ти февруари 1819-та година на Конгресот во Ангостура на иницијатива на Симон Боливар, Венецуела прогласила независност од Шпанија.
Иако венецуелската војска можеби и не е една од најбројните армии на јужноамериканскиот континент, кога станува збор за воената техника и вооружувањето, можеби се вбројува во една од најмоќните. Главен адут е авијацијата, на чело со руските ловци "Su-30MK2V".
Копнената техника на венецуелската војска е од руско потекло, а осовината на армијата ја сочинуваат 92 тенка T-72B1V и 123 единици од руските модернизирани амфибијски борбени возила на пешадијата "BMP-3M" со засилена конструкција, како и со вграден најнов систем за нишанење.