Коѕијас: Референдумот во Скопје не е услов за преспанскиот договор

Коѕијас објасни дека и претседателот Ѓорге Иванов и премиерот Зоран Заев биле избрани со помал број гласови од оние кои беа „за“ на референдумот.

„Договорот вели дека референдумот е избор на Владата во Скопје, но не е ниту услов, ниту предуслов, ниту правно барање за имплементирање на договорот, ова е од голема важност. Сега одиме на политичкиот дел. На прв поглед кога некој го гледа процентот од гласањето и ако не ги знае балканската политика и политиките на Скопје и нивната реалност, ќе каже дека е мал. И логично е. Но, ако знае колку гласови се овие 37-38 проценти и што се случи на претходните избори, тогаш ќе сфати одредени работи“, изјави Коѕијас.

Шефот на грчката дипломатија нагласува и дека не се прочистени избирачките списоци и дека доколку гласале сите кои имаат право на глас, а тоа еден до 1,2 милиони гласачи, мнозинството од 50 проценти плус 1 ќе изнесуваше помалку од 600 000.

„Реалното избирачко тело е околу еден милион, до 1,2 милиони. За договорот од Преспа ова реално тело доби над 50 отсто. И да гласаше целото избирачко тело, резултатот пак ќе беше над 50 отсто“, појасни Коѕијас.

Тој предупреди дека некои помали партии биле финансирани од Турција за да останат воздржани на референдумот. Во овој контекст, тој истакна дека Турција е подготвена да ја спречи Грција да го развие своето влијание на Балканот и својата стабилизирачка улога во регионот.

Во исто време, тој истакна дека Македонија без стабилност и кохезија може да пропадне и тоа ќе биде најлошото сценарио не само за самата земја туку и за Балканот.

На прашањето кога ќе биде донесен договорот од Преспа од страна на грчкиот парламент, Коцијас истакна дека откако ќе има промена на Уставот во Скопје, во рок од една до две недели грчкиот парламент ќе го ратификува истиот. Тој проценува дека ќе има над 151 пратеници кои ќе гласаат „за“.